Milih pengari rayat ukai pekara bemain

SARATOK : Rayat ba sitak Kunsil Nengeri (Dun) Krian diperansang terus nyukung sebarang chalun ari Gempung Parti Sarawak (GPS) ungkup pengawa bepilih PRN-12 deka datai.

Chairman Parti Demokratik Progresif Krian,Jeffry Jimbun Walter Kidang madah, diatu nadai parti bukai kelimpah ari GPS ulih meri pengelantang sereta meretika genap penanggul ditapi rayat ba menua tu.

“Apin lama ke udah, kitai sama udah nemu penyarut ti bisi nyadi ba menua kitai ditu iya nya ketegal penemu politik ti enda sama lalu meri pangka ngagai rayat.

“Nya alai, pengawa milih pengari rayat ukai pekara dikena kitai bemain laban genap pemutus deka ngenataika empas ti besai ngagai peranak menua tu empu,”ku iya.

Jimbun madah munyi nya rambau Program Gempuru Ngemekuh Kaul enggau Rayat ba Rumah Ajong Blabot, Tembawai Pok ditu lemai kemari.

Pia mega ku iya, menua pelilih Saratok chukup betuah laban ngembuan pengundi ti landik milih pengari dikerindu sida nyadika pengari ngelama tu.

“Pemutus pengawa bepilih ba Saratok ngelama tu mega udah nyadika teladan pengundi ba sitak bukai ketegal ari pemerani sida ngaga pemutus ti tau pulaika pemaik ungkup sida empu.

“Nya alai, aku minta kita maya PRN ila sekali agi ngaga pemutus baka ke udah nengah chara nyukung chalun ari GPS,”ku iya.

Nandu nya ku Jimbun, GPS mega pelasar ti pemadu dikena mulaika hak Sarawak bekaul sempekat MA63 enggau pekara bukai ke bekaul enggau pemaik rayat.

“Berasai temegah laban raban komiti tu ditumbuhka dikena nyaga hak Sarawak kelimpah ari beratika pekara bukai ti bekaul.

“Ungkup Krian, aku bisi ngembuan visyen dikena nyungkak ikas gaya pendiau mensia mayuh ditu kelimpah ari nampung pengawa ngemansangka menua sereta rayat ari sukut infrastruktur enggau modal mensia.

“Tu mega nyengkaum pengawa ngempit agi kaul enggau semua ejensi perintah ngambi ulih berati enggau semak agi pelin pemansang ungkup rayat,” ku iya.

Suara Sarawak