BINTULU: Bemacham inisiatif patut dipejalai dikena ngangkatka industri kraf jari ngagai tikas tinggi agi setipak enggau pemansang ekonomi dunya kemaya hari nyengkaum ngatur Minggu Kraf.
Ku penemu Gloria Paula, 28 taun, siku pedagang enggau pengemeran kraf di menua tu, dagang enggau industri kraf menua tu endang patut diangkat sereta diperati.
“Tu mega dikena nentuka pesaka ti ditampung ari sida ke tuai tu enda punas ngapa diseruyut jeman.
“Lalu pengawa ngangkatka kraf jari tu begunaka pengawa ngelaku ti patut seruran chakah dipejalai lalu enda ngetu ngapa,” ku Gloria madah nyemetak.
Besaup Ngemansang
Ku Gloria, semua piak endang patut besaup ngangat enggau ngemansang industri tu, nadai ngira ejensi peribit tauka perintah.
Pekara tu beguna amat ku iya laban tebal agi raban indu ke ngaul diri ba pengawa kraf jari enda deka mujur enti nadai saup ari semua raban bekaul.
“Kami ke indu maya lepa ari ngintu ruang bilik endang rindu nusuk manik, nenun kain, beranyamka tikai enggau mayuh bansa pengawa bukai.
“Ati gagit sereta ngining enti bisi bala bakih mandangka asil kraf sida, nya kebuah aku minta raban bekaul nyaup ngemansangka pengawa ti ulih ngemai pemansang ba ruang bilik,” ku iya ti nyadi kaban Serakup Kraf Sarawak.
Minggu Kraf
Entara program suah digulu Gloria dikena ngemansangka dagang kraf iya nya Minggu Kraf ke diatur Serakup Kraf Jari Sarawak.
Ku Gloria, tu nyengkaum atur program Minggu Kraf Bintulu ti udah diatur dalam pun bulan Mei tu tadi, ti mujur ngempuruka raban ngemeranka kraf jari selampur menua.
Program tiga hari berunggu, berengkah ari 3 ngagai 5 Mei, nyadika pelasar mansangka kraf jari ari Bintulu ti udah dipenyadika temuai dipebasa Kaban Parlimen (MP) Bintulu Dato’ Seri Tiong King Sing.
Sama datai ngemata pengawa bejadi Minggu Kraf Bintulu Chairman Serakup Kraf Jari Sarawak enggau Menijar Besai The Spring Mall Bintulu Angelyn.
Temegah Ati
Ngelansa pasal atur program Minggu Kraf Bintulu ku Gloria, Dato’ Seri Tiong King Sing mega udah dibai bejalai ngabas bangsal ti mandangka dagang kraf bala penyereta Minggu Kraf Bintulu.
“Penatai Dato’ Seri Tiong meri reti chukup besai ngagai bala kami lalu deka nyadi kenang manis jemah.
“Kami temegah ati nerima sukung ari pengari rayat menua tu, tibar jaku peransang mega nyadika malin kami keran agi ngemansangka diri ba dagang kraf tu,” ku Gloria ke mega kaban Serakup Kraf Malaysia.
Dato’ Seri Tiong mega bisi meda asil kereja bala penyereta program ti ngaul 20 penyereta datai ari selampur Sarawak.
Minggu Kraf Bintulu udah dipelanja The Spring Mall lalu Gloria ngarapka mayuh agi gempung korporat neladan pengawa palan bebelika barang nya.
Ngading Dagang Temuai
Nangkan nya ku Gloria, enti kitai berati silik, industri kraf jari tu mega ulih ngading pemansang dagang temuai sereta matak temuai ari menua bukai datai kitu.
Kitai mega nemu sebagi ari produk dagang temuai ti chakah dikemansangka Perintah Sarawak diatu ngaul industri kraf kelebih agi ditengkebang bansa asal ti ngembuan penyelai enggau pengelain.
“Tu pengelebih dikembuan kitai peranak menua asal, pengelandik jari ti ditampung kitai ari aki ini lalu penulin kraf nyadika pesaka enggau kelai bansa kitai.
“Aku temegah ati ngaku diri peranak asal Sarawak ari bansa Dayak, penakan Iban-Kenyah, ke alai indai aku Kenyah ari Long Bulan Belaga, lalu apai aku bansa Iban ari Sibu,” ku Gloria ngelansa asal penatai diri.
Juluk Besai
Baka orang bukai mega ku Gloria, besai amat juluk iya deka maju dalam industri kraf jari tu ukai semina ulih nyungkak ekonomi ruang bilik, tang mega ulih ngetanka pesaka asal kitai bansa Dayak.
Genap bansa endang bisi kelai enggau bansa kraf sida empu, baka nya mega kitai bansa Dayak ti tebilang ngembuan mayuh pesaka enggau keresa lama, tiun jaku mega nitihka ai enggau menua sereta macham bansa main asal ti benyawa enggau enda.
“Bisi mayuh kebuah aku keran sereta angkunka pengawa nengkebang kraf tu ti nyadika peransang enggau malin kenyau ari terubah aku ngaul diri ba pengawa tu.
“Kesatu, ngiga belanja ari untung bedagang kraf jari, kedua, ulih nanggam kaul bebakih lalu ketiga ulih bedua sereta bekunsika penemu enggau peneleba begulai enggau pangan diri.
“Ari pengawa tu, pengelandik ti dipeturun ngagai kitai enda deka lenyau ngapa ari dunya tu, tu tuju aku ke bendar,” ku Gloria nyimpul randau enggau Suara Sarawak.
