Minta pengari Iban di Bawang Assan

SIBU: Urung 1,200 komuniti Iban ari sitak Bawang Assan mantaika peminta dekaka ubah ba bala ketuai sida.

Sida selubang penemu dekaka penuduk Dun Bawang Assan diberi ngagai Parti Pesaka Bumiputera Bersatu (PBB) lalu diarika komuniti Iban maya Pengawa Bepilih Nengeri Ke-12 (PRN12) ila.

Nya alai Mandal Presiden PBB Dr Annuar Rapa’ee temegah ati meda peneguh kaul serakup komuniti dia ti seati sereta sepenemu dekaka sida diarika bansa diri.

Annuar mega chukup lantang ati sida ke datai udah mantaika utai dikedeka diri ngena peluang gempuru malam nya ti ngaul komuniti Iban.

“Tu sejarah baru parti ke alai komuniti minta siti ubah besai ti deka dipejalai ba Dun Bawang Assan udah tu.

“Udah datai ba maya Dun Bawang Assan tu diarika chalun datai ari komuniti Iban empu kelebih agi peranak menua ditu.

“Aku deka mantaika juluk ati kita tu ngagai bala ketuai tetinggi parti,” ku Annuar.

Iya mansutka jaku nya ngarika Sapit Presiden PBB ti mega Sapit Kepala Menteri Datuk Amar Douglas Uggah Embas rambau Malam Solidariti PBB N.53 Bawang Assan ba sebuah hotel tebilang ditu, malam tadi.