ARTIKEL

PUH BEDAGANG… Stanfordson Ninting, tebilang agi dikangau Tony Angie

Minyak angi Tonilicious digaga ari bungai ros

Facebook
Twitter
LinkedIn
WhatsApp
Telegram

NGEMBUAN pengerindu sereta enda ngetu belajar nyadi resia penyulut Stanfordson Ninting, 31 ngasilka minyak angi bepelasar ke bungai ros dikumbai Tonilicious.

Iya ti tebilang agi dikangau Tony Angie madahka diri datai ari Rumah Philip, Nanga Janan Tekalit, Katibas, Song,

“Aku ngambi Setipikit Pengelandik (SKM) ba bidang Pemajik Gamal, Diploma bidang Pengatur enggau SKM Ngatur Hotel.

“Ngena semua penemu enggau pengelandik tu aku numbuhka sebuah serikat dikumbai Bright Crystal Enterprise ngasilka inovasyen produk minyak angi ari bungai ros dikumbai Tonilicious,” ku iya lebuh bejaku ngagai Suara Sarawak, kemari.

Ku Tony, produk minyak EDP Tonilicious ngembuan rempah kediri laban digaga ari minyak bungai ros lalu dichampur Tony empu.

“Minyak angi tu tan lama, muntang dibai, bau angi enggau dijual ba rega ti patut,” ku iya.

Ku Tony, iya belajar ngaga minyak angi ari dua iku pengajar ti mega pedagang pemajik gamal ba Sarawak iya nya Pemungkal Lovelyita Skincare Cosmetic, Ita Midin enggau Pemungkal CC Beauty Skincare Cosmetic, Cecelia Lagak.

NGEMBING

“Seduai udah mayuh mantu, ngajar sereta meri jaku peransang ngagai aku lebuh tama dalam dunya dagang tu suba.

Baca lain  Jalai kebun sawit ari Kpg Ensengei Melayu – Gedong deka ditar

“Enti dikenang, penanggul putus penatai pemisi ketegal pengerekai penyakit Covid-19 meri jalai penampak ngagai aku ngaul diri ba dunya dagang ngaga minyak angi.

“Sebedau nya, laban ke suntuk belanja, aku bejual bemacham produk lokal bansa kitai Dayak sepengelama setaun laban deka ngiga peneleba.

“Mulaika pengingat, pedis endar berundingka pengidup diri, baka ni deka ngiga belanja tambah pengelama setaun nya.

“Tang Puji Tuhan, peneleba nya ngasuh aku majak kering lalu angkat ngerandang jalai ti repa nya sereta majak tampak kelebih agi pengudah ngaga enggau nyual minyak angi,” ku iya.

Tony madah, ari pengawa bejual tu iya ulih ngumpul duit dikena nyadi puku ngepunka dagang nyual minyak angi ngena chap dagang iya empu.

“Laban aku sigi minat nyium bau minyak angi ari mit, dia aku berunding deka ngeluarka produk Tonilicious.

“Nya alai, ba taun 2021 aku ngambi lisin atas nama Bright Crystal Enterprise.

“Semua pengawa ngaga minyak angi tu diadu aku empu ba rumah laban bedau bisi kedai kediri,” ku iya.

BAU BUNGAI

Tony madah maya baru berengkah suba iya ngeluarka empat bansa bau minyak angi dikumbai Sakura, Odessa, Andora enggau Azalea.

Baca lain  Peneleba gawa dikunsika Napoleon Lawik ari Pemberita nyadi Pelaut

“Udah nya, aku mai ati ransing sereta ngambi peluang ngeluarka Limited Edition on EDP Parfum enggau Barbie Edition on EDP Parfum’ nunda gaya tauka trend kemaya hari.

“Sigi lebuh berengkah bejual suba aku udah ngena pelasar digital ngelakuka produk aku baka Facebook, WhatsApp enggau TikTok.

“Pelasar tu meri mayuh penguntung ngagai aku lalu mantu ngerembaika dagang,” ku iya.

Enda ngetu naka nya aja, Tony diatu ngembuan website minyak angi kediri.

“Maya baru berengkah suba sigi lubah bulih asil, tang munyi ku sempama seagi enda tepantup ba bandir ati aku ransing, puh serta enda muntang mantul ngapa.

“Atas berekat Tuhan, diatu minyak angi Tonilicious nerima timbal manah rayat Sarawak, Semenanjung enggau Brunei.

“Diatu asil jual minyak angi aku bulih RM1,000 seminggu tauka urung RM3,000 ngagai RM5,000 sebulan,” ku iya.

Taja napi mayuh pemar, Toni tan ati napi semua nya laban iya ukai orang ti muntang nyerah alah.

JULUK ATI

“Sinu ga ati ninga jaku juk, jaku emba enggau dikemaruh orang suba.

Baca lain  Sabati ngagihka bantu penyampau RM275,000 ungkup 69 gerempung, ejensi

“Tang aku sigi enda muntang nyerah alah, semua jaku negatif orang ngagai aku sigi diambi nyadika peransang awakka enda lemi.

“Kala aku ngasaika diri deka badu ngadu pengawa tu, tang lebuh aku ngenang penyauh aku udah ngerembang jalai dagang tu asai jauh amai ga deka nikal pulai, nya aku terus mansang ke mua belama,” ku iya.

Tony madah iya enda jampat nyida sereta mutarka siti-siti penanggul enggau manah maya dituntung penanggul.

“Niat ati aku sigi deka ngemajuka diri ngena chara diri empu.

“Aku seruran betungkat ke pengingat lebuh udah sesingkang maju ari orang, kitai enda tau bejaku renjan enggau seruran ngemaruhka diri.

“Aku mai bala nembiak rebak baru enggau indu rumah tangga anang takut ngepun pengawa baru kelebih agi dalam dunya dagang laban semua utai ulih meri penatai pemisi ngagai diri empu,” ku iya.

Ketungkah randau, Tony andalka produk minyak angi Tonilicious iya ulih rembus ngagai makit besai di Sarawak enggau Malaysia.

“Nyema bisi jereki aku ngarapka Tonilicious ulih rembus ngagai makit antarabansa,” ku iya.

MINYAK angi Tonilicious
Tony chakah ngelakuka minyak angi iya lebuh bisi program enggau pengerami diatur ba menua tu.
NARIT PERATI… Reruai Tony suah ditapatka mensia mayuh kelebih agi temuai dipebasa ti tekait ati meda minyak angi digaga iya.

BERITA LAIN

Raban KMKK meseti regas gawa

BINTULU: Sida ti dichiri nyadi tuai komuniti enggau tuai raban bansa (KMKK) patut chakah agi bejalaika pangku pengawa sida dikena nentu raban nya ulih ngesan

BERITA TERBARU

Hutan jadi sumber ekonomi utama

KUCHING: Jabatan Hutan Sarawak mengambil satu lagi langkah penting ke arah memperkukuh inisiatif karbon hutan di Sarawak dengan menandatangani Surat Persefahaman (LOU) dengan Universiti Sains

Gali ilmu dengan banyak membaca

KUCHING: Ahli Dewan Bandaraya Kuching Utara Sih Hua Tung menggesa masyarakat untuk lebih peka terhadap kepentingan membaca khususnya pada zaman teknologi masa ini. Menurutnya, menggalakkan