Minyak subsidi ba adan menua dipatau

KOTA BAHRU: Peti enggau bup rikod pejalai penerit adat nyadi siti agi chara nagang penyalah mai minyak subsidi belalai di menua tu.

Pengawa nya dipejalaika Opis Menteri Dagang Dalam Menua enggau Pekara Penguna (KPDNHEP) ba stesyen minyak ke bisi ba adan menua.

Menteri iya, Datuk Seri Alexander Nanta Linggi madahka peti enggau bup rikod nya dikena matau entukar menua luar ti tama ngisi minyak dia.

Ku iya, minyak dijual ba stesyen nya dipatau rat laban perintah enggaika entukar menua luar tama ngagai menua tu sepeneka ati beambi ulih ngisi minyak penuh tangki laban rega minyak ba menua sida jauh mar.

“Kelimpah ari matau entukar datai ari menua luar ti deka ngisi minyak kitu, raban penerit adat KPDNHEP mega matau pengawa ba stesyen minyak tu.

“Pekara tu beguna amat nentuka minyak subsidi ungkup rayat kitai empu enda tebasau ke bukai,” terang iya.

Nanta mansutka jaku nya ba aum pemberita pengudah bejadika Pengawa Ngelancharka Peti enggau Bup Rikod Pejalai Penerit Adat KPDNHEP ba stesyen minyak semak adan menua, ditu pagi tadi.

Suara Sarawak