Miri champion Pekit Nimbak Laja Renggat Nengeri Sarawak

BINTULU: Kontinjen Kaunsil Lumba Sekula-Sekula Bagi Menua (MSSB) Miri udah mujur dipadu nyadi champion Pekit Nimbak Laja (MSS) Sarawak ke bepalan ba SMK Kemena kena Hari Lima minggu ke udah.

Ba pekit ke diatur sepengelama tiga hari nya, penimbak laja dari MSSB Miri berupai nunjukka pengelandik sida kenyau ari keterubah pekit nya dipelabanka sida.

Miri dipaduka nyadi champion nengah pengulih 332 poin jauh ninggalka MSSB Sibu ba penuduk lumur dua enggau 176 mata lalu ba penuduk lumur tiga dipangku MSSB Kuching enggau 153 mata.

Berebak enggau nya, penimbak laja ari Miri jauh nyulut agi lebuh sida beempu ke gelar Kategori Recurve 15 Taun Ke Baruh (TKB) Indu Lee Siaw Ying lalu Compound 18 TKB Kong Ke Xin.

Ba kategori lelaki mega pulai ngelawa sida lebuh penimbak laja ba Recurve 12 TKB empu Rayan Ying, 15 TKB empu Yu Jie enggau Compound 18 TKB diempu Josiah Hong.

Ba pekit nya mega, penimbak laja ke pemadu landik kategori 18 TKB pulai ngelawa Ceceil Nathanael lalu kategori indu 18 TKB ia nya Hartini Saging eggau Lee Siaw dipadu ke nyadi Penimbak Laja Pemadu Landik.

Penulung Direktor ba Sektor Pembangunan Nembiak Opis Pelajar Menua Sarawak Hassan Sarbini besai bendar pengarap ati ba pekit nimbak ke ulih nyungkak ke pengelandik nembiak ngagai tikas ke lebih tinggi agi.

“Opis Pelajar Pelilih Tatau/ Sebauh untuk mujur ngatur pekit tu lalu ngaga rikod lebuh keterubah ia bisi 221 iku penyereta enggau lebih 500 iku nyengkaum bala pengajar udah ngulu pekit tu”.

“Sebedau tu, nitih ke penerang ke udah dipadah ngelawa aku, semina lebih 100 iku penyereta ke bisi datai enggau pekit tu,” ku iya.

Ba awak nya mega, Ketuai Opis Pelajar Pelilih Tatau/ Sebauh muji kerejasama ke udah digaga semua piak ketegal pemujur sida ke betuaika Opis Pelajar nya ngatur Pekit Nimba Laja Renggat Menua Sarawak.

Suara Sarawak