Miri diatu Zon Gadung

MIRI: Bagi Menua Miri dirintai nyadi Zon Gadung Covid-19 lebuh nadai kes aktif ditemu ba bagi menua nya kenyau ari 24 April tu tadi.

Pekara nya dibantaika Menteri Perengka Pengangkut Datuk Lee Kim Shin ti nyadi Menteri bempu tanggungpengawa bagi Komiti Penyangga Penusah Ngenyit Bagi Menua Miri nengah sebengkah penerang, ditu tadi.

Ku iya, Miri dirintai ba Zon Gadung berindik ari nadai kes Covid-19 baru diripotka pengelama 14 hari.

“Aku berasai gaga amat lebuh dipadahka Miri udah nyadi Zon Gadung kena 9 Mei tu tadi.

“Aku mega dipadahka diatu semina bisi tiga kes positif Covid-19 ti agi dipatau ba Sepital Miri,” terang iya.

Nambahka nya ku Kim Shin, ari tiga kes nya, dua kes ari Miri enggau siti agi kes ari Limbang ke diripotka nadai sakit bukai.

“Aku deka meri terima kasih ngagai Komiti Penyangga Penusah Ngenyit Nengeri (JPBN) Sarawak laban semampai nyukung Komiti Penyangga Penusah Ngenyit Bagi Menua Miri ngujungka kami ulih gawa enggau manah ngambi nyapai asil ti manah.