Miri majak dikemansang – Abang Johari

MIRI: Perintah Sarawak keran bejalaika projek pemansang di Bagi Menua Miri.

“Kami deka seruran bejalaika mayuh bengkah projek pemansang di Miri ditu nitihka perambu ti udah dilangkar,” ku Kepala Menteri Sarawak Datuk Patinggi Abang Johari Tun Openg.

Iya nambah, entara projek pemansang ti udah diperambu Perintah Sarawak ungkup taun tu baka nyeleti jalai alun enggau ngemayuhka sambung bekal ai kelebih agi ba kandang menua pesisir.

Abang Johari mansutka jaku nya lebuh dirandau rambau pejalai ngabang Hari Raya ngagai rumah Adun Bekenu Rosey Yunus di Taman Bumiko, pagi Hari Empat tu tadi.

“Sekeda projek begunaka timpuh, setaun ngagai dua taun tembu nitihka penyampat enggau penyikar raban bejalaika projek sereta bepanggai ba pekara bukai,” ku iya.

Kelimpah ari nya, Menteri Muda Jalai Pesisir, Datuk Julaihi Narawi madah projek ti nyambung jalai pesisir lanchar dipejalai.

“Kami mega merambu deka ngaga jematan ba sekeda jalai tebing tasik nitihka pematut,” ku iya nerang.

Nangkan nya ku iya, sekeda tinda mega udah diberi ngagai bala kunteriktor.

NGERAPIT KAUL… Abang Johari bisi limpang ngabang ngagai rumah Chairman Laku Management Sdn Bhd Datuk Ahmad Laj Bujang di Kampung Luak.