Miring kena minta Petara merekat pengidup kitai

PENGAWA miring sekeda daya idup kitai Iban ti bisi kaul enggau adat asal bansa kitai ti mengkang dikemeran nyentuk seharitu taja bisi sekeda kitai udah megai pengarap Kristian.

Nyadi, sekalitu kitai deka ngenang pasal pengawa miring ke suah dikereja raban bansa Iban Saribas enggau Kalaka.

RENGKA PIRING

Entara rengka piring diguna iya nya deruku apung, pinang, sirih, kapu, gambir, asi, garam, asi manis, ketupat, asi pulut dilulun dalam ruas, penganan iri, sagun, pisang, berau kuning, rendai, telu manuk, tuak enggau bulu manuk.

Bulu manuk dikena lebuh besampi ke alai bulu manuk dichabut enggau dilut ba darah manuk ke udah disayat.

Nambahka nya, rengka piring Gawai Burung iya nya pisang jait, engkudu, pisang lengki, banjang, tepus, engkenyang, gerama, kusing, asi burak, asi kuning, asi pulut chelum, penganan iri, sungkui, telu ti udah direbus, ketupat enggau rendai.

Pengudah semua rengka piring nya disedia, rengka nya deka dibai ari dapur rumah panjai enggau diengkah ba bilik, tengah ruai, panggau tauka tanju lebuh Gawai Burung didiri.

Biau tauka leka sampi nya bisi bida nitihka pengawa dikereja kitai seraya dalam sampi nya, kitai minta semua pengawa diberekat.

Pengudah tembu bebiau, manuk deka disayat ba rekung enggau bulu sayap manuk deka dichabut enggau dilut ba darah manuk nya tadi.

Udah nya tadi, bulu manuk ti udah penuh enggau darah deka ditepu ba piring ti udah tembu disedia.

TUJU MIRING

Bansa kitai miring dikena ngangau enggau meri basa ngagai Petara, Orang Panggau, Bunsu Antu enggau Petara Aki Ini lebuh ngatur pengerami.

Nangkan nya, piring tu mega dikena meri puji ngagai Petara laban udah merekat enggau nulung kitai ba semua pengawa kelebih agi bumai betaun.

Pengawa miring tu mega endur kitai minta berekat, betuah, gerai nyamai enggau lantang senang.

Tu mih maya kitai beniat, minta ading enggau ngemujurka semua pengawa bejalai sereta dijaga ari jai mimpi enggau utai ke enda manah.

Muai pedara tu mih beguna amat laban dipechaya Petara deka ngirup ai pedara enggau nulung sereta merekat pengidup kitai kelimpah nyeliahka kitai ari jai mimpi enggau semengat jai.

Raban bansa Iban endang ngemeratka adat enggau penti pemali ti ditampung ari aki ini kitai kelia.

Munyi ku sempama, ‘Bejalai Betungkatka Adat, Tinduk Bepanggalka Pengingat’.

Nya alai, kitai patut ngetanka adat asal bansa Iban ngambika bansa kitai dikelala mengkang ngemeratka adat enggau pengarap asal taja dunya makin moden.