Miss Petite Universe International Sarawak (MPUIS) 2021 diatur nitihka SOP

MIRI: Pekit kumang dikumbai Miss Petite Universe International Sarawak (MPUIS) 2021 ungkup Limbang, Miri enggau Bintulu mujur diatur nitihka Atur Standard Pengawa (SOP) ke terit.

Pengari komiti pengatur, Elizabeth Sharon madah, pekit diatur ngena chara baru nya tetap nerima sukung enggau timbal manah ari semua raban ti ngambi bagi.

Ku iya, nipakka rambai jaku ‘Elegance is when the inside is as beautiful as outside’, pekit tu ukai semina ngira pemajik gamal aja tang beratika mayuh pekara bekaul enggau pemanah ulah sida ke bepekit.

“Sepuluh iku indu dara udah dipilih masuk renggat kepenudi ke alai sida tu diakim ari penyemetan gamal, pemanah ulah enggau basa sida lebuh begulai enggau komuniti.

“Nambahka nya, sida mega deka dipeda ari pemintar bejaku lebuh mansutka penemu, bejuraika pekara ti nyadi kemaya hari enggau juluk ati sida ungkup pengelantang semua,” ku iya lebuh dirandau Suara Sarawak.

Sharon madah, pekit nya kebendar diatur bulan Januari nyin tadi tang dilanjar berindik ari Atur Mindah Betagang Belebas (PKPB) dipejalaika perintah.

Sida mega minta sanding penemu ari raban bekaul pasal pengawa nya laban ngaul pengerai enggau pengelikun mensia mayuh kelimpah ngasika atur dipejalai diatu.

“Kami semina ulih ngangauka bala akim profesional, bala pemekit enggau staf ke dipadu ngatur pengawa aja lebuh pekit tu diatur.

“Nyentuk orang ke nyempulang bala penyereta mega enda disagi tama ngagai balai endur pekit tu diatur sehari nya.

“Kebuah pia laban kami ngasika SOP enggau atur udah ditetap dikena nyeliah sebarang penusah nyadi dudi hari,” terang Sharon nyemetak.

Ungkup penerang, tiga iku dara bajik udah dipilih menggi gelar MPUIS 2021 lalu sida tiga deka bepekit ngarika menua Sarawak ngagai renggat nasional udah tu.

Sida tiga nya Ullia Ulanda (Limbang), Dayaanagha Paramanathan (Miri) enggau Mangala Sushmita (Bintulu) seraya tujuh pemekit renggat kepenudi ke bukai nya Christy Wan, Janet Sre James, Sylvia Azzn, Elia Kuang, Viviana Uring, Diana Betty enggau Vivian Kuan.

Raban profesional ti dipebasa nyadi akim rambau pekit nya Lumur Dua MPUIS 2020 Raja Nur Amalina, Lumur Tiga MPUIS 2020 Jennifer Sim enggau Pemungkal Lantera Astana Sarawak, Christopher Anthony Ikus sereta Sharon empu.

TANGGUNG PENGAWA BESAI… Bala akim pekit; (ari kiba) Sharon, Jennifer, Christopher enggau Raja Nur Zairea.

Suara Sarawak