“Kami (MP) semina enda setuju enggau penemu dipansutka sida bekaul enggau ubah MA63 apin lama.”
KUCHING: Perintah Besai enda patut kelalu nitih asai ati bekaul enggau pemuntan diri tang patut lebih agi sensitif enggau pekara ti enda disetuju rayat.
Kaban Parlimen (MP) Santubong, Datuk Seri Dr Wan Junaidi Tuanku Jaafar madah laban ti merintah, dia perintah besai enda patut kelalu nitih pengasai ati bekaul enggau pemuntan Rang Undang-Undang (RUU) Ubah Pekara 1 (2) Konstitusyen Perintah Besai bekaul Sempekat Malaysia 1963 (MA63).
“Rayat ukai musuh sida, lalu kami mega ukai musuh sida, tang kaban dalam politik.
“Kami (MP) semina enda setuju enggau penemu dipansutka sida bekaul enggau ubah MA63 apin lama,” ku iya.
Wan Junaidi madah munyi nya lebuh dirandau raban pemberita pengudah Aum Supreme Kaunsil Parti Pesaka Bumiputer Bersatu (PBB) ba Indu Opis PBB di Jalai Bako ditu, kemari.
Nangkanka nya, iya madah sida (MP) bisi hak lebuh nulak tauka enda nerima ubah MA63 baka dipadah perintah besai.
“Dalam pekara tu, sida patut bebasaka konstitusyen laban enti ukai kitai (MP) sapa agi deka ngelindung konstitusyen menua tu.
“Lebih agi lebuh kaban parlimen ngangkat sumpah nyadi pengari rayat, kitai endang besumpah deka ngelindung konstistusyen enda ngira nama pangkat kitai,” ku iya.
Wan Junaidi madah lebuh sida enda nyukung, Putrajaya sereta Menteri Besai enda nitihka nama pekara dikedeka sida.
“Sida nemu kitai ulih ngena Dewan Rayat dikena ngetuka sida ngemaruhka kitai.
“Keterubah iya, Sabah mega enda setuju tang pemuas umbuk sida, Sabah mega setuju nitihka sida,” ku iya.
Rambau pemutus ubah MA63 apin lama, ubah nya diputuska enda nyadi lalu perintah besai chukup enda lantang ati enggau perintah Sarawak.
