SARATOK: Sepenyampau RM25,000 udah dikemendar ngambi bisi dikena raban Gerija St Paul, Roban ditu ngaduka pemansang dia.
Kaban Parlimen Saratok, Datuk Ali Biju lebuh ngemendarka agih belanja nya madah, raban gerija megai tanggungpengawa besai nempa modal mensia ti menyana.
Ku iya, agih belanja ti diberi ulih dikena sida ngaduka bemacham pengawa ungkup pemansang raban gerija empu nyengkaum pengawa ngaul komuniti dia.
“Besai pengandal aku ngagai raban gerija ditu ulih ngatur pengawa ti meri pemaik enggau pengelantang ngagai komuniti diau ngelingi.
“Ari pengawa nya mega, kita ulih ngempung bala ditu segulai sejalai, diau bebaik lalu sama mansang ke mua lebih agi ba pengawa pengasih ngaul komuniti,” ku iya.
Kelimpah ari nya, Raban Orang Indu Gerija St Paul nya mega nerima RM10,000 ti dikeandal ulih dikena sida ngaduka pengawa bekaul pemansang orang indu.
Ali ngemendarka agih belanja lebuh dikangau ngulu enggau nyadi temuai dipebasa ba Pengerami Makai Lemai Gerija St Paul, Roban kena lemai Hari Enam nyin tadi.
