SARATOK: Sepenyampau RM55,000 bantu diberi Kaban Parlimen Saratok, Datuk Ali Biju ngagai peranak Rumah Joshua Sulau, Tanjung Tapang, Awik ditu ke tasah karam di darat pagi tadi.

Iya berumban ngesah sida ke tasah nya pengudah nerima berita sinu ke nuntung bala dia.

Kelimpah ari nya, bantu pemakai baka asi bungkus, berau, ai irup, gula, telu, ruti enggau utai diguna bukai mega bisi diberi tadi.

“Aku arapka bantu tu ulih ngelempungka tating penusah ditapi sida serumah.

“Aku mega arapka sida liat ati napi penguji besai tu lalu anang kelalu ngerunding utai ke udah nyadi.

“Jaga pengerai ngambi kitai ulih ngepunka pengidup baru,” ku iya meri jaku peransang.

Ke penerang, 11 pintu Rumah Joshua Sulau nadai endur diau agi pengudah rumah panjai sida angus pagi tadi.

Penusah dipelaba nyadi urung pukul 11.30 pagi nya udah nganguska rumah panjai batu dua ringkat lalu pun penusah agi dipansik.