MPKK : Anang mechahka rayat

Enti kitai bepechah, tanah kitai tentu deka lenyau. Baka ke dipeda kitai ba komuniti Bumiputera di Semenanjung Malaysia alai diatu sida nyau bepechah ketegal politik.”

KUCHING: Kepala Menteri Datuk Patinggi Abang Johari Tun Openg berasai enda lantang enggau pejalai Kaunsil Pengatur Komuniti Kampung (MPKK) laban nya siti ari chara deka mechahka rayat ba nengeri tu.

“Enti kitai bepechah, tanah kitai tentu deka lenyau. Baka ke dipeda kitai ba komuniti Bumiputera di Semenanjung Malaysia alai diatu sida nyau bepechah ketegal politik,” ku iya.

Iya madah munyi nya rambau pengawa Nyerah Surat Hak Milik Tanah Seksyen 18 Kanun Tanah Negeri Kampung Kudei Baru ba Indu Opis Parti Bumiputera Bersatu (PBB) ditu, kemari.

Nya alai, rayat patut ngetanka hak sida kelebih agi bekaul enggau tanah sereta beratika penyerakup ba nengeri tu.

Iya madah diri deka bebendar ngetanka hak rayat sereta menua tu.

PENGAWA MANAH… Datuk Patinggi Abang Johari Tun Openg muji pemanah Patimah Kushairi,78, ke udah meri tanah iya ungkup Surau Al- Amin Kampung Kudei Baru, Kuching. Bela dipeda (ari kiba) Rasdi Ahmad (anak), Sapit Chairman PBB Satok, Ibrahim Baki, Datuk Bandar DBKU Junaidi Reduan enggau bala bukai.-Gambar Ghazali Bujang

Ku iya, tu tangkan ngagai jaku keremba Perinta Besai ti nguji deka ngaul hak autonomi nengeri tu.

“Enti Pakatan Harapan (PH) nguji ngachau hak kitai di Sarawak, tu deka nyadi pengujung ngagai nengeri kitai.

Tu nyengkaum hak autonomi imigresen enggau undang-undang nengeri kitai,” ku iya.

Nangkan nya ku iya, iya berasai enda lantang nerang.

Abang Johari mega beratika pekara ke didanjika PH rambau pengawa bepilih besai Ke-14 alai sida deka ngemunaska pengawa mayar PTPTN enggau ngamatka pengawa ngetanka hak Bumiputera.

“Aku enda nagang sida bejalaika MPKK, tang enti kitai bepechah ketegal nya, kitai deka nyadi ‘mangsa’ ari pengawa nya.

“Aku deka bebendar ngetanka nengeri tu baka udah digaga Niang Tok Nan,” ku iya.

Abang Johari mega nerang PH diatu benung kiruh nyendiaka diri ngagai pengawa bepilih nengeri ri deka datai, nya alai semua pengawa digaga Sarawak enda kala betul ba mata sida.

“Taja pia sida patut ingat, aku bisi kuasa nentuka maya pengawa bepilih nengeri ti deka datai!” ku iya madah nyemetak.