KUCHING: Kaunsil Pengatur Komuniti Genturung Pendiau (MPKK) nadai negu sereta ngachau struktur Komiti Pemansang enggau Pengelikun Genturung Pendiau (JKKK) ku Pemesai Khas Menteri Kereja Raya, Simon Joseph Usau.

Ku Simon, Tuai Rumah enggau Ketuai Raban Bansa sigi deka bejalaika pengawa ngempung rayat nitihka tusun adat ti udah ditetapka Majlis Adat Istiadat Sarawak (Mais) enggau Opis Pelilih.

“Sistem tu udah lama dikena sereta dikemeranka kitai Dayak ke diau ba rumah panjai.

“Tuai Rumah ti dichiri endang manah agi dipilih ari nembiak redak ba rumah panjai tauka genturung pendiau nya empu,” ku iya ba sebengkah penerang berita ditu tadi.

Iya madah munyi nya nimbal penemu dipansutka Sapit Kepala Menteri Datuk Amar Douglas Uggah Embas ti madahka enda ibuh numbuhka komiti bukai begulai enggau JKKK laban pekara nya semina ngasuh rayat saru penemu sereta pambar.

Simon nerang, MPKK siti komiti ke patut ditumbuh ba rumah panjai enggau genturung pendiau ngambika ulih nambah bungkur tanggungpengawa nembiak redak ngemansangka menua diri empu.