MPKK bisi agenda belalai?

KANOWIT: Inisiatif perintah Pakatan Harapan (PH) ti deka numbuhka Kaunsil Pengatur Komuniti Genturung Pendiau (MPKK) ba menua tu dipeda baka bisi ‘agenda’ belalai.

Kaban Kunsil Nengeri (Adun) Ngemah Alexander Vincent madahka nengeri tu lama udah ngena Komiti Pengatur Pengelikun enggau Pemansang Genturung Pendiau (JKKK) ti udah umbas ungkup Sarawak.

“MPKK nyata lebih ngagai politik perintah PH dikena nyadi mata enggau pending sida.

“Nya kebuah sida bebendar deka numbuhka MPKK ditu nyadi injin dikena sida ngerampas nengeri tu ari perintah Gempung Parti Sarawak (GPS).

“Penumbuh MPKK tu kebendar bisi tuju enggau PH baka ti enda lurus ngaga nya,” ku iya lebuh bejaku ba Pengerami Ketuai Begulai enggau Rayat ti diatur Parti Pesaka Bumiputera Bersatu (PBB) pampang Ngemah di Rumah Kendawang, Ulu Tuah ditu, ensanus.

ARI KAMI…Kendawang (dua kanan) nyua tepa ngagai Alexander seraya dikemataka Allan (kanan), Luang (tiga kiba) enggau sida bukai.

Sama datai Adun Machan Allan Siden Gramong, Chairman PBB pampang Ngemah Kaunselor Luang Baring, Tuai Rumah Kendawang Baring enggau bala bukai.

Alexander madah JKKK ti dikena ngelama tu endang nyamai dipejalaika rayat di menua tu.

“Nama tuju numbuhka ditu? Kitai ukai takut tang enda nyamai enggau penumbuh MPKK. Enti Sarawak nadai bisi komiti ti ngatur rumah panjai enda ngawa, tu kitai udah bisi JKKK.

“Nyemetak amat mantaika PH bisi ‘agenda’ belalai dalam numbuhka MPKK di Sarawak,” ku iya.

Iya ngasaika perintah PH seruran bisi mayuh chara baru nguruska perintah menua tang seraya numbuhka sida nadai ngerunding empas pengawa nya.

Nitihka iya, tiap utai baru ti deka digaga nadai salah tang patut mikir pangka enggau empas ngagai rayat sereta nadai ngeruga pengelantang enggau pengelikun nengeri ti lama udah diuan rayat.

“Sekali agi aku ngulang Sarawak nadai begunaka MPKK. Kitai udah bisi JKKK lama udah,” ku iya.

Dia iya mai peranak genturung pendiau ngambika terus nyukung GPS ba pengawa bepilih ti deka datai dikena neruska perintah nya ditu.

Tandu iya, ba baruh pegai Kepala Menteri Datuk Patinggi Abang Johari Tun Openg ti mega Chairman GPS, mayuh perambu pemansang udah dilanggur ungkup rayat menua tu.

“Taja pan mayuh projek tauka agih belanja nengeri tu udah dikinsilka, perintah GPS ba pegai Abang Johari tetap neruska projek nya ngena belanja kitai empu.

“GPS enggai meda rayat asa ati tauka puni nya Abang Johari nyanggup neruska projek nya ungkup rayat Sarawak.

“Perintah GPS lebih mereti ngagai nengeri banding ari PH ti lebih mereti ngagai seberang nyin (Semenanjung Malaysia) enda ngira sensitiviti enggau empas ngagai kitai,” ku iya.

Tuju besai program tu diatur dikena meri tauka nyuaka bantu YB ngagai sitak JKKK tauka berandau enggau peranak ditu seraya nerang enggau silik tuju JKKK ari MPKK ti disebut PH.

Pia mega, aktiviti tu ulih nanggam rat kaul enggau semengat penyerakup entara GPS di Kanowit ti difomulaka YB3A iya nya Kaban Parlimen Kanowit Datuk Aaron Ago Dagang, Adun Ngemah Alexander Vincent enggau Adun Machan Allan Siden Gramong.

Suara Sarawak