KUCHING: Kaunsil Mengeri Padawan (MPP) udah mujur bejalaika penyampau 135 projek pemansang beungkus RM14.91 juta taun tu.
Chairman iya, Lo Khere Chiang madahka Perintah Sarawak udah ngagihka belanja ungkup 80 buah Projek Tranformasyen Menua Pesisir (RTP) beungkus RM12 juta, dua projek ba baruh Projek Rayat beungkus RM1.15 juta enggau 53 projek ba baruh Perintah Besai beungkus RM1.76 juta.
“Kelimpah ari nya, ba baruh Langgur Pemansang Malaysia Lumpar ke-12 (RMK12) perintah udah ngemandarka 15 buah projek beungkus RM15 juta ti deka berengkah digaga taun baru nyentuk taun 2025 ila.
“Ba baruh RMK11, MPP udah bejalaika 375 projek beungkus RM82.8 juta iya nya RM15.2 juta ungkup pemansang mensia mayuh, RM35.8 juta ungkup RTP enggau RM31.8 juta ungkup Projek Rayat,” ku iya.
Khere Chiang madah munyi nya nyerumba Hari Ngintu MPP ti ke-25 dipanchar terus ba Facebook MPP kemari.
Ku iya, pemansang rega tanah di MPP udah nambah ari 3.5 peratus ninting taun kenyau lima taun udah lalu.
“Dalam timpuh 20 taun, mengeri enggau bazar mega majak besai berengkah ari 20,984 pengempu ngagai 73,117 pengempu ba pun taun tu tadi.
“Pekara tu ulih dipeda ari pemansang di Batu Kawa, Kota Sentosa, Jalai Matang, Jalai Batu Kawa, Palan Komersil Emart Batu Kawa, P Residence, Moyan Square, Prima Matang, RPR Landeh, Skim Palan Pengentap Baru Bengoh enggau Kota Padawan empu.
“MPP andalka ulih ngerumban pemansang infrastruktur seriris enggau peminta rayat awakka MPP terus nyulut,” ku iya.
