ARTIKEL

SIRU… Joyce chakah sereta ransing bejalaika bemacham pengawa pengasih enggau volunteer kelebih agi nengah GAPAI.

Mrs Petite Global 2023, Joyce Nyupeh pun inspirasyen ngagai semua indu

Facebook
Twitter
LinkedIn
WhatsApp
Telegram

JULUK besai deka nyadi pun inspirasyen tauka motivasyen ngagai orang bukai sereta mantu komuniti mujur nukang pintu ati siku pengajar, Joyce Nyupeh, 30, ngaul dunya pageant tauka pekit kumang.

Berebak enggau nya, ba bulan Februari taun nyin kemari, iya masuk Pekit Mrs Petite Global 2023 lalu mujur dipadu nyadi champion ba pekit nya.

BATANG SUKUNG… Kelimpah ari indai, anak enggau laki dikesayau meh nyadi pun sukung iya nerus minat ba dunya pekit kumang enggau mantu mensia mayuh.

Ba pekit besai nya, Mrs Petite Global 2023 ti datai ari Kampung Apar Singai, Bau nya mujur ngalahka penyereta bukai ti datai ari Filipina enggau Jipun.

Ukai naka nya aja, Joyce bela ngempu anugerah bukai baka Anugerah Intebiu Pemadu Manah, Anugerah Catwalk Pemadu Manah, Anugerah Congeniality enggau Anugerah Darling of The Crowd.

PUN INSPIRASYEN

Ngelansa senentang penyulut iya ba pekit nya, Joyce ti udah nikah sereta ngembuan siku anak indu nya madahka diri chukup temegah, beterima kasih sereta enda nyangka diri tau champion.

Iya madah, pekit kumang nya ukai semina dunya glamor tauka tebilang aja tang nya ulih mai empas ti besai ngagai komuniti kelebih agi raban indu enggau nembiak mit.

KENANG BEREGA… Joyce rambau mujur dipadu nyadi Mrs Petite Global 2023.

“Penyulut aku ba pekit tu ulih nyadi pun inspirasyen enggau motivasyen ngagai mensia mayuh kelebih agi raban indu ngambi bela nyapai penyulut besai ba pengawa sida empu.

“Pengudah champion ba pekit tu, aku udah ngaul diri ba bemacham aktiviti komuniti enggau pengawa ngintu pengelantang.

“Pia mega, aku suah dirandau ba stesyen radio baka Cats FM sereta stesyen televisyen baka Televisyen Sarawak (TVS) enggau Steadey dikena meri motivasyen ngagai mensia mayuh,” terang iya.

Ungkup penerang, Pekit Mrs Petite Global nya diatur Tiara Management ti betuai ke Nickson Sim dikena meri peluang ngagai raban indu ti udah nikah nyengkaum indai tunggal enggau balu nyapai juluk sida mantai advokasyen ba panggau besai.

Nangkan nya, pekit nya mega dikena ngelaku pengawa negap raban indu lalu meri peluang ngagai sida mai ubah besai ngagai komuniti baka nyadi pemantai sada tauka pun inspirasyen komuniti.

NGESAN PANGKU PENGAWA BESAI

Baca lain  Pekit Ratu Etnik Vol.1 2024 Piala Justin Williamson Bridal’s Studio mai komuniti ngelala identiti etnik bukai

Kelimpah bejalaika pengawa pengasih enggau mantu komuniti ti begunaka bantu, Joyce diberi pengandal ati nyadi akim ungkup mayuh pekit kumang ba bemacham renggat nyengkaum renggat antarabansa.

Iya mega dikangau bekunsi penemu ba media sosial sereta numbuhka kelas bejaku ba bala mayuh enggau catwalk ngagai rebak biak ti deka ngaul pekit kumang.

PANGKU PENGAWA BESAI… Joyce ngesan pangku pengawa besai nyadi siku indai, bini, pengajar sereta Mrs Petite Global 2023.

“Bepelasar ke peneleba aku empu, mayuh orang nyengkaum nembiak ti diajar aku berasai ransing enggau bisi inspirasyen meda penyulut aku ba pekit tu sereta pengawa pengasih ti dipejalaika aku enggau raban GAPAI.

“Udah tentu tu mai empas ti besai ngagai komuniti sereta muka mata mensia mayuh ngambi chakah enggau angkun agi mantu orang bukai ti begunaka bantu.

“Pengawa pengasih ti dipejalaika aku tu ulih narak ulah ti manah sereta rindu ke orang bukai ngagai kami sebilik, bala bakih enggau anak indu aku empu.

“Kebuah pia laban aku sigi mai sida ngaul pengawa pengasih tu lalu ari nya meh sida ulih belajar mantu enggau kasih ke orang bukai, enda ngemeratka diri empu sereta bisi peneleba mantu pangan diri.

“Aku andal anak indu aku ulih nunda singkang aku sereta ngembuan ati sinu enggau kasih ke orang bukai lalu sanggup mantu sida,” ku Joyce.

MAYUH PEKARA BARU DIPELAJAR

Sekumbang ngesan pangku pengawa nyadi Mrs Petite Global 2023, Joyce mayuh belajarka pekara, penemu enggau peluang baru.

“Siti ari nya, aku diberi pengandal ati nyadi Presiden GAPAI ti berengkah ditumbuh ba bulan Ogos 2022.

JOYCE NYUPEH

“Ungkup penerang, GAPAI tu sebengkah gerempung pengawa pengasih ti chakah bejalaika pengawa nya dikena mantu komuniti tauka raban orang ti begunaka bantu.

“Naka diatu, kami udah bejalaika lebih 10 aktiviti pengawa pengasih ti diatur ba sekula menua pesisir, sepital, palan nyaga jelu siga enggau mayuh agi ti bukai.

“Kami mega chakah bejalaika pengawa volunteer dikena mantu komuniti.

“Aku chukup ngemerat aktiviti ngintu pengelantang tu laban tu meh advokasyen sereta juluk ati aku mantu orang bukai ba selampur Malaysia kelebih agi Sarawak.

Baca lain  PKPB di Sarawak deka diperunding dulu

“Ngena peluang tu, aku ngarika raban GAPAI ngelalu mensia mayuh nyukung inisiatif kami ba pengawa mantu raban ti patut dibantu sereta bekerejasama enggau kami mantu raban nya.

“Kami bejalaika pengawa tu ngena turu kami empu lalu nadai dipelanja sebarang serikat tauka ejensi bukai.

“Turu tu datai ari pemeri orang kediri tauka organisasyen ti sedia nyukung kami enggau nengah ‘sistem undi’ pekit kumang,” ku Joyce.

RABAN INDU PATUT ANGKAT

Indai ti chukup bajik sereta pintar nya ngelalau raban indu ngambi bela angkat ngemansangka diri empu ba bemacham sukut.

Lalau iya, badu agi ngasaika diri empu baruh ari orang bukai tang kitai patut angkat nyapai penyulut besai ngambi sada kitai nyaris agi didinga.

Ungkup sida ti bisi ati deka tepejuh ba dunya pekit kumang kelebih agi sida ti udah belaki sereta bisi anak, ku iya, Pekit Mrs Petite nya meh pelasar ti manah dikena kita ngamat juluk besai nya.

“Pekara tu chukup manah ukai semina dikena nyapai juluk kita tang nyadi pelasar ti nemban dikena nambah pengandal ati ngagai diri empu sereta ngulih penemu enggau pengelandik baru.

“Ukai naka nya aja, kitai ulih bekunsi advokasyen ngagai mensia mayuh ba luar din sereta ulih nyadi inspirasyen tauka peransang ngagai sida.

“Nengah pelasar tu mega, sada kitai deka nyaris agi didinga mensia mayuh ngambi kitai ulih mai empas enggau ubah ti besai ngagai komuniti ba pekara ti manah,” ku lalau iya.

LEGASI MANAH MESETI DITAMPUNG

Joyce madahka diri chukup betuah enggau temegah ati mujur dipadu nyadi Mrs Petite Global 2023.

Lebih ngemegah, ku iya, pelasar nya mantu iya mai mayuh ubah enggau pemaik ngagai komuniti nengah bemacham pengawa pengasih ti udah dipejalaika iya.

Nya alai, iya ngarap Mrs Petite Global 2024 ti mujur dichiri ulih nerus legasi nya, chakah bejalaika pengawa pengasih, nyadi pun inspirasyen ngagai mensia mayuh sereta temegah mai nama Mrs Petite.

Baca lain  Semengat bepekit nyapai penyulut patut diterenak – Ali Biju

Ku Joyce, pekit kumang ba Sarawak beguna amat ba pengawa meri inspirasyen ngagai rebak biak lalu mayuh sida mekuh pengawa nya.

“Ari nya, sida ulih nyadi duta ti mai sada raban indu ngagai tikas ti tinggi agi ba bemacham sukut kelimpah ngelakuka mayuh palan narit ati ti bisi ba menua tu.

“Pekara tu beguna amat dikena matak mayuh agi temuai ari menua luar datai ke Malaysia kelebih agi Sarawak ngambi majak dikelala serata dunya.

“Tu mega ulih nyungkak ekonomi menua ba sektor dagang temuai enggau mantu komuniti lokal,” terang Joyce.

BATANG SUKUNG

Lebuh dirandau bekaul pun inspirasyen iya mekuh dunya pekit kumang, seraya temegah Joyce ngaku laki enggau indai ti dikesayau meh nyadi pun inspirasyen iya ba pengawa nya.

“Aku betuah laban ngembuan laki ti chukup mereti minat aku ba pengawa tu lalu iya meh enda ngetu meri sukung ngagai aku.

“Sekumbang aku ngambi bagi ba pekit tu suba, iya meh ti nyaga anak kami duai, meri aku sukung emosyen, nyadi penganta sereta penyading penemu aku ba pekara bekaul catwalk enggau gaya tauka styling.

“Enti nadai sukung penuh ari laki enggau kami sebilik, udah tentu aku enda ulih nyapai penyulut besai tu. Sida meh ti enda ngetu meri peransang enggau semangat ngagai aku,” tusui iya.

Tampung iya, keterubah masuk pekit Mrs Petite nya nyentuk mujur dipadu nyadi Mrs Petite Global 2023, bemacham pemar diasaika iya.

Ku iya, pangku pengawa nyadi siku indai, bini lalu ba maya sebaka nyadi siku pengajar endang chukup berat ba iya sekumbang ngambi bagi ba pekit nya.

“Penanggul besai ditapi aku maya nya suba iya nya penanggul magi awak diri. Aku meseti pintar magi awak diri entara bejalaika pangku pengawa enggau nerus minat diri.

“Semua tu enda ulih dikereja aku kediri enti nadai sukung penuh ari laki, indai enggau kami sebilik,” ku Joyce.

BERITA LAIN

RM10,000 nganti Kumang Gawai Betong 2024

BETONG: Pekit Kumang Bagi Menua Betong 2024 nesau bala indu dara bansa Dayak selampur menua Malaysia ke beumur 18 taun enggau tuai agi ngerebut perais

Jini ninga indai manjung tiga kali

KUCHING: Anak tudah ti dipelaba ditagup jagu ba Sungai Rayu, Jalai Selang Lundu kena Hari Tiga tu tadi bisi ninga indai iya manjung tiga kali

BERITA TERBARU

Adun Repok lawat dua pesakit warga emas

SARIKEI: Timbalan Menteri Sumber Asli dan Kelestarian Alam, Datuk Seri Huang Tiong Sii melawat dua warga emas yang terlantar sakit di kediaman mereka, pada Khamis.