MSPO: 22 pekebun nerima setipikit

KUCHING: Kaunsil Setipikit Minyak Sawit Malaysia (MPOCC) ngansak semua pekebun sawit enda tau enda ngembuan setipikit Minyak Sawit Lestari Malaysia (MSPO) taun tu.

Sapit Kepala Menteri ti mega nyadi Menteri Betanam Betupi Moden, Tanah Adat enggau Pemansang Kandang Menua Datuk Amar Douglas Uggah Embas madah, ba Sarawak 22 ari 32 Kluster Minyak Sawit Mampan (SPOC) udah bisi setipikit lalu ke bukai deka nerima taun tu.

“Aku bisi amat pengandal sida ke bukai tu deka nerima setipikit ujung taun tu.

“Perintah Sarawak deka meri kerejasama penuh begulai enggau Perintah Besai mutarka sebarang penanggul ngaul isu tanah di menua tu,” ku iya.

Uggah mansutka jaku nya rambau aum pemberita pengudah berandau begulai Menteri Industri Besai Teresa Kok sereta raban diberi pengandal di Sarawak ba Kompleks Nembiak enggau Lumba ditu, ensanus.

Ku iya, bisi 10,000 nama agi deka ditentuka status tanah sida sekalika tanah enggau pekebun mit diaku tauka enda.

“Kitai deka nentuka tanah enggau pemansut pekebun nya diaku.

“Pengudah diaku, kitai deka ulih ngenukuka status kebun sida meruan,” ku iya nerang.

Ku Uggah, bala pekebun mit di baruh SPOC nadai napi penanggul tang semina sida ti ngembuan tanah entara 100 ngagai 1,000 ekar pemesai.

Berebak enggau nya ku Teresa Kok, genap pekebun sawit endang patut ngembuan setipikit MSPO laban deka meri jamin ngagai sida ti bekebun sawit.

“Nengah kerejasama perintah nengeri tu, dikearap pekara ngaul setipikit MSPO pekebun sawit ulih teputar jampat.

“Kami mega ngarap pekara tu ulih diputar ujung taun tu,” ku iya nandu.

Ku iya, tu mega ulih nyamin bekal minyak sawit menua semampai bisi lalu pekebun sawit nerima rega manah agi dudi hari.

Sama datai berandau Ketuai Direktor Komiti Minyak Sawit Malaysia, Dr. Ahmad Parveez Ghulam Kadir, Ketuai Pemesai Eksekutif MPOCC Chew Jit Seng, Menteri Muda Pemansang Tanah Adat Datuk Roland Sagah sereta bala pengari pekebun sawit menua.