MTES ke pemaik ekonomi Sarawak jemah

KUCHING: Kaunsil Pengatur Ekonomi Sarawak (MTES) ditumbuh nyerumba pengerekai pandemik Covid-19 iya nya ke pemaik ekonomi nengeri tu jemah.

Sapit Kepala Menteri Tan Sri James Jemut Masing madah, nya ditumbuhka Perintah GPS dibaruh iring Kepala Menteri Datuk Patinggi Abang Johari Tun Openg.

“Maya pandemik Covid-19 nyadi, iya ukai semina ngujungka ekonomi global kusut tang mega meri pangka ke enda manah ngagai Sarawak,” ku iya madah nengah sebengkah penerang kemari.

Ku iya, pengawa numbuhka MTES nya ngembuan empat Sub-Kaunsil iya nya Sub-Kaunsil Pengkalan Penerang enggau Inovasyen betuaika Abang Johari, Betanam Betupi Dandang Besai, Modal Mensia enggau Servis diiring Sapit Kepala Menteri Datuk Amar Douglas Uggah Embas, Perengkaguna Pemun, Utiliti enggau Perengka Pengangkut diiring, Masing empu enggau Pengeraja Asal sereta Pemansang Industri diiring Sapit Kepala Menteri Datuk Amar Awang Tengah Ali Hasan.

“Aku andal MTES tui endang keterubah ba Malaysia lalu kitai ngaga perambu ekonomi ke tegap sereta mungkur semua, nya mega mungkur maya Sarawak angkat ari penanggul ketegal Covid-19.

“Aum dalam Video MTES udah dipejalai pagi tu (25 Jun) begulai enggau rayat Malaysia ke tebilang iya nya : Tan Sri wahid omar, tan sri idris jala, Prof Dr Fatimah Karri enggau Prof Dr Madeline Berma, semua sida nya endang orang ke landik ba pekara ekonomi tu,” ku iya.

Iya madah, sida bisi merambu deka ngurangka pengawa nguna pengeraja asal ba sektor kuasa, nempa peluang gawa nengah pemansang infrastruktur nyentukka duit ulih masuk ngagai ekonomi.

“Nengah chara ngemendarka pekara tu enggau lengkas, perintah patut ngurangka ‘rad tapes’.

“Atur ‘The Walk In The Park’ dalam bejalaika dagang pasca Covid-19 nadai diguna agi.

“Siku Profesor, ti nyereta aum dalam video, tu merambu minta pelin dagang kitai ukai semina lurus tang melit, nya utai ke mujur, ngena nya lalu nguna iya baru,” ku iya.

Iya madah, nengah chara nya iya deka ulih nyaga pemeresi rampa menua enggau atur ti meruan agi deka ulih japai.

“Pendiau rama kitai mega patut dijaga laban Sarawak nyadi menua ke pemadu manah di Malaysia ngembuan kaul rama, pengelandik mensia meseti dikemansang, dijaga enggau ke bukai.

Kenu ku iya, sistem pelajar mega patut dipansik baru laban sida enda ulih ngelakka 12 taun dalam pelajar enggau semina taun pengawa belajar nya ngachau sistem pelajar.

“Nyema Sarawak deka ngidupka diri ari majak tusah ketegal
Covid-19 enggau nyapai status menua maju 2030 ila, kitai patut ngemeratka semua pekara tu.

“Sarawak meseti ngengkah politik enggau pekara bukai ke bebida ba belajang, Abang Johari mega naka ulih ngengkahka Sarawak ba penuduk iya nya genap anak Sarawak deka ngasaika penguntung ari pemansang ba taun 2030.

“Aku pechaya, Abang Jojari lurus penemu enggau bebendar ngulihka pekara ke pemadu manah lalu kitai patut terus meri sokong,” ku iya.

Suara Sarawak