Muhyiddin angkat sumpah nyadi Menteri Besai ke-8 pagila

KUALA LUMPUR: Yang di-Pertuan Agong Al-Sultan Abdullah Ri’ayatuddin Al-Mustafa Billah Shah setuju nyiri Tan Sri Muhyiddin Yassin nyadi Menteri Besai kelapan.

“Agong udah setuju nyiri YB Tan Sri Mahiaddin Bin Md Yasin (Muhyiddin) nyadi Menteri Besai seriris enggau Pekara 40 (2)(a) enggau Pekara 43 (2) (a) Kunstitusyen Perintah Besai,” ku penerang media nya.

Penerang nya dipansutka Datuk Pengelola Bijaya Diraja Istana Menua Datuk Ahmad Fadil Shamsuddin. Pengudah mendingka timbal ari semua ketuai parti politik ti ngarika parti diri, ba penemu Agong, Kaban Parlimen ti dipelaba bulih sukung majoriti bala Kaban Parlimen iya nya YB Tan Sri Mahiaddin Bin Md Yasin (Muhyiddin), Kaban Parlimen Pagoh (P143).”

Kenu ku Ahmad Fadil, Pengerami Beradat Nyuaka Surat Chiri enggau Ngangkat Sumpah Penuduk nyadi Menteri Besai deka diatur pukul 10.30 pagi pagila ba Istana Negara.

Agong udah ngerah endang pemutus ke pemadu manah ungkup semua lalu iya nyadaka pengandal ati ngambika penyarut politik nya diketu, ku Ahmad Fadil.

Istana Negara sehari tu nerima mayuh chalun nama ti diasuh nyadi Menteri Besai ari ketuai parti politik ke bisi dalam Kaunsil Parlimen enggau kelimpah Kaban Parlimen ti ngatika diri.

Kenu ku Ahmad Fadil, proses nya betampung kenyau ari gerah Al-Sultan Abdullah enggau ketuai parti politik sereta Kaban Parlimen ti ngatika diri dipinta mantaika nama chalun sebarang Kaban Parlimen ungkup nyadi Menteri Besai.

Agong mega ngenataika pengaga ati enggau terima kasih ngagai rayat enggau semua ti bekaul lebih agi ejensi perintah, raban pengelikun enggau piak media, ku Ahmad Fadil.

Suara Sarawak