Mulu deka diangkat nyadi pelilih mit

MULU: Menua Mulu deka diangkat nyadi pelilih mit ngambi pengawa dagang temuai muntang dikerembai dia.

Kepala Menteri Datuk Patinggi Abang Johari Tun Openg madah, menua nya deka disikap ngena ejensi bekaul enti udah diangkat nyadi pelilih.

Ku iya, ejensi baka raban imigresyen, kastam enggau polis deka ditumbuh lalu raban sida nya dianjung gawa kia matau pengelikun enggau pengelantang dia.

“Kitai ngatur manah pemansang infrastruktur ditu awakka Mulu ulih nyadi sebuah mengeri mit ti disikap ngena perengkaguna pemun.

“Nya kebuah sekeda ejensi nyaga pengelikun patut ditumbuh ditu baka imigresyen, kastam enggau polis awakka menua likun lalu sektor dagang temuai ulih ngerembai,” ku iya.

Abang Johari mansutka jaku munyi nya lebuh dipebasa bejadika Pengerami Makai Lemai di sebuah balai ditu malam tadi.

Iya madah baru, semua pengawa nya deka dipelanja perintah nengeri empu taja pan tanggung pengawa nya patut dipejalaika Perintah Besai.

Suara Sarawak