Musin Bah : Seliah penusah enda disadang

MUKAH: Apai indai, diri sebilik enggau komuniti dipinta seruran matau aktiviti dikereja anak sida kelebih agi maya musin ampuh bah dikena nyeliah sebarang penusah enda disadang nyadi.

Menteri Pengintu Pengelantang Komuniti, Orang Indu, Ruang Bilik enggau Pemansang Anak Mit Datuk Seri Fatimah Abdullah madah, sida patut nyaga bala anak kelebih agi maya kemisi sekula enggau pulai ke menua tauka anak ke diau ba genturung pendiau ti napi penusah ampuh bah.

“Kitai suah meda sida begelumu ngereja mayuh aktiviti lalu kitai enggaika sebarang penusah dikeenggai nyadi.

“Nya kebuah, anang enda matau pejalai enggau aktiviti dikereja sida laban mayuh penusah ulih nyadi diatu kelebih agi maya musim ampuh bah.

“Sebedau tu aku empua kala meda ai sungai ba Batang Oya chukup deras. Taja kitai nemu nyemerai tang kitai deka lemas enti ai nya kelalu deras,” ku iya.

Fatimah mansutka jaku nya pengudah bejadi Bengkel Ngenegap Gerempung Ukai Dikuasa Perintah (NGO) Bagi Menua Mukah ba sebuah hotel tebilang ditu, kemari.

Suara Sarawak