Kerejasama SDNU-Pemaik

KUCHING: Gerempung Bansa Dayak Sarawak (SDNU) deka ngaul kerejasama Gerempung Ketuai Raban Bansa Enggau Tuai Rumah Bansa Iban Bagi Menua Kuching (Pemaik) mutarka penanggul setinggan, sida ti berumah lalu diau ba tanah pendam SDNU ditu.

Presiden iya, Tan Sri William Mawan Ikom madahka SDNU deka nganjung diligit berandau enggau raban Pemaik enda lama agi ngambi ulih berundingka chara mutarka penanggul tu.

“Sebagi ari chara mutar penanggul tu iya nya mantu ngiga enggau nyendiaka taba pengentap pendiau ungkup sida tu.

Mawan mega bisi berasai asa sereta nyima meda ulah sekeda raban ti salah guna tanah pendam endur sida berumah chara belalai tauka ngentak rumah setinggan ti nadai pemendar.

“Pendam tu udah kelalu sekut lalu nadai endur agi taja endur numbakka bangkai orang ti parai,” ku Mawan.

“Kitai (SDNU) enggau Pemaik deka bekerejasama berundingka chara pemadu manah mutarka penanggul tu pulaika pemaik semua,” ku Mawan nambah.

Penerang Mawan tu belalauka tanah Pendam Tusur diempu SDNU di Jalai Chawan, ditu.

Nitihka penerang mega, mayuh rumah setinggan didiri atas tanah pendam, bisi sekeda besemak enggau pendam lalu bisi rumah dientak atas pendam empu.

Mawan sepenemu enggau nyukung penerang Sapit Kepala Menteri Datuk Amar Douglas Uggah Embas ti minta Pemaik bejalaika pangku pengawa sida mantu perintah ngiga chara mutarka penanggul rayat.

Dulu ari nya, Uggah mega minta Pemaik ti diketuai Temenggong Datuk Bernard Agan mantu ngempung penerang penyampau tubuh rayat seranta nentuka perintah ulih mantu ngelempungka tating penusah ditapi sida.

Ku Uggah, enti penerang udah digempung lalu Pemaik enggau Perintah Sarawak ulih berundingka chara mutar enggau ngelangkar program bantu ari perintah.