KUCHING: Begunan ikonik Muzium Budaya Borneo udah nyadi model ngagai bala temuai ngambi dichunto pelilih bukai, ku Datuk Seri Abdul Karim Rahman Hamzah.
Menteri Dagang Temuai, Industri Kreatif enggau Seni Pemerindang nya madah, ba endur bukai di Sarawak, bisi minat enggau peminta numbuh muzium ba pelilih sida empu.
“Pelilih Miri enggau Sibu udah minta numbuhka sebuah muzium besai baka Muzium Budaya Borneo pengudah sida sedar pasal pemesai guna muzium nya ba pengawa nyungkak industri dagang temuai.
“Aku andal ba taun bukai, kitai deka meda mayuh agi muzium ditumbuh di Sarawak,” ku iya.
Ngelansa pasal pemujur besai nya pengudah muzium dilanchar taun nyin kemari, Abdul Karim madah, Muzium Budaya Borneo udah matak temuai ti ngemantupka ati ba raban pengusung ari menua tu enggau menua luar.
“Muzium nyadi endur meseti digusung temuai ari pelilih bukai baka Miri enggau Sibu.
“Tambah mega diatu, kitai meda apai indai ngansak bala anak gawa ba muzium pengudah majak minat ke pengawa nya,” ku iya agi.
Abdul Karim mansutka jaku nya pengudah bejadi Pengawa Nutup Hari Muzium Antarabansa (HMA) Renggat Nasional 2023 ba Hotel Riverside Majestic, ditu kemari.
