Muzium Sarawak pemadu besai di Malaysia

Nya deka nyadi siti kelai ngemegahka rayat Sarawak

“Enggau penembu begunan tu ila, nya deka dirintaika nyadi siti ari produk dagang temuai baru Sarawak sereta nambahka pemisi ekonomi menua.”

KUCHING: Kompleks Muzium Sarawak deka nyadi muzium kedua pemadu besai di Asia sereta pemadu besai ti Malaysia.

Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah madah muzium nya deka nyadi siti kelai ngemegahka rayat Sarawak.

“Aku pechaya muzium enggau pemesai 6.726 meter persegi tu deka nyendiaka mayuh perengka guna ti pemadu manah nitihka tikas entarabansa kelebih agi ngagai bala temuai.

MANAH…Pemanah Begunan Kompleks Muzium Sarawak ditimpai ari langit. -Gambar Ghazali Bujang

“Enggau penembu begunan tu ila, nya deka dirintaika nyadi siti ari produk dagang temuai baru Sarawak sereta nambahka pemisi ekonomi menua,” ku iya.

Abdul Karim madah munyi nya lebuh Pengerami Nyerahka Begunan Kompleks Museum Sarawak di Auditorium begunan nya ditu, kemari.

Nangkan nya ku iya, nengah koleksi ti dipandang tauka disimpan ba begunan tu, nya deka nyadi malin dalam pansik ngagai pesaka sereta main asal Sarawak.

“Kitai ukai semina deka meri fokus ngagai temuai menua tu tauka ari menua luar tang mega bala pemansik ari selampur dunya ngagai Sarawak ngaga mayuh macham pansik.

“Tu deka ngangkatka nama Sarawak ngagai renggat dunya sereta mai bekau positif ngagai Sarawak ba ari mayuh sukut,” ku iya.

Kelimpah ari nya, Abdul Karim madah kabinet udah ngemendarka akta The Sarawak Cultural Heritage (Managemente and Control of the Sarawak Museum) Rules 2019 ngagai Opis Muzium Sarawak.

“Tuju akta tu ngambika ngemuntangka Direktor ngemujur tusun atur sereta tanggungpengawa ngagai begunan nya enggau pekara bukai,” ku iya.

Udah nya, Abdul Karim madah ungkus dikena ngaga begunan kompleks nya mungkur belanja RM 308 juta.

Perintah Sarawak mega udah ngemendarka RM 15 juta dikena nambahka belanja ngaga Kompleks Muzium Sarawak, ku iya.

PEMADU BESAI…Kompleks Muzium Sarawak tu dirikodka pemadu besai ba Malaysia enggau kedua besai ba Asia.-Gambar Ghazali Bujang

Suara Sarawak