BETONG: Pemungkal Rumah Muzium Ulu Padeh, Edmund Rintai chakah mansik, nyidi, ngiga enggau ngumpul keresa lama Iban kelebih agi di menua adap Betong ditu.

Ditumbuh dalam taun 2014, Rumah Muzium Ulu Padeh diatu ngembuan macham bansa keresa lama enggau pesaka asal kitai bansa, asil ari pengepuh enggau pengeliat ati Edmund empu.

Nyadi siku ari kaban Kelab Ngepan Betong (KNB) ku Edmund, 90 peratus ari keresa lama bisi di rumah muzium nya endang ari menua Ulu Padeh.

“Nya kebuah rumah muzium tu digelar Muzium Ulu Padeh, nipakka penatai keresa ti bisi dipandang ditu.

“Semua keresa lama ditu mega endang dikumpul aku ngelama tu, ukai baru diatu, nyauka serap menua Ulu Padeh udah ditujah aku ngulihka keresa tu,” ku Edmund lebuh dirandau Suara Sarawak.

Ku Edmund, enti ukai ketegal pengeran ati iya, semua tu enda deka nyadi nyata lalu enda ulih dipeda rebak baru diatu.

“Ari pengekih, pengepuh enggau pengeliat ati aku bejalai ‘mansai’ ngulihka semua keresa ke bisi ditu endang nyadi kunchi dikena ngansak diri sereta ditandu nyadika jaku peransang dataika muzium tu mujur ditumbuh.

“Suah mega aku nanya ngagai bala bakih, kaban belayan diri empu tauka sida ke tuai di rumah panjai, enti sema sida bisi tetemu tauka ninga rita pasal sebarang keresa lama.

“Udah bisi seling penemu enggau tunga menua, aku naka ulih nguji nyidi iya, napatka menua ti disebut, ngiga runding lalu berundingka jaku ti kena nyilup tuju pejalai maya mansang kia.

“Tu ukai kereja ti muntang, suah agi penatai kitai pulai ngemai ati lebu, ati asa, tang ukai semua baka nya, bisi sekeda nerima penatai kitai enggau ati lantang. Pekara tu ngasuh aku ransing agi begiga,” ku Edmund nusui kenang diri.

Edmund mega nadai entu bekiraka belanja lebuh nurun begigaka semua keresa tu, laban ba penemu iya empu, semua tu nadai pulaika pengerugi lalu ati mega tepantup amat pengudah bulih utai dijuluk ati.

“Bisi sekeda keresa tu dibeli aku ngena mata duit sereta bisi nya diberi pia aja, nitihka penyiru kitai siku-siku, ditanggam enggau kaul rat nyengkaum diambuka anak.

“Bisi sekeda disabang aku ngena utai bukai tauka besilih nitihka peminta orang ti ngempu keresa lama nya. Ambika chunto, baku temaga tu diberi orang ti ngambu aku ke anak iya,” ku iya nerang.

Ngelansa pasal keresa lama dikemisi enggau dipandang ba muzium nya ku Edmund, endang enda ulih ngeluang tauka limpang ari utai ti semengat, bisi penti enggau pemali ti diintu meruan.

Macham bansa keresa lama ti nyelai, jarang dipeda sereta mar digiga laban tebal agi keresa lama tu pesaka ari aki ini menya ti berumpangka menua asal kitai bansa.

“Keresa lama tu diibun enggau diintu orang tuai ke meruan ngibun sereta nampung bilik tuai, tauka pemai dibai sida ke indu lebuh belaki nguai, nyemilik entua.

“Penusah angus ke suah nuntung peranak rumah panjai ke alai mayuh keresa lama kitai Iban lenyau pia aja lalu pekara tu balat ngirauka ati, nya kebuah aku keran numbuhka muzium tu.

“Kebuah pia laban aku deka nentuka keresa lama tauka pesaka asal ari peturun kitai meruan bisi dipeda rebak baru dataika jemah,” ku Edmund madah nyemetak.

Ku Edmud, sebagi ari utai nyelai bisi disimpan tauka ditaruh ba muzium tu iya nya pengaruh.

Pengaruh tu ku iya endang diserahka orang ti ngempu pengaruh nya empu, manang betubuh tiga iku.

“Pengaruh tu endang chukup diintu, dipiring enggau ditaruh memanah sereta dipandang ngambi bisi dipeda bala ke bisi datai kitu.

“Mayuh keresa lama ke bukai bela bisi dipandang ditu baka tajau, tabak, capak, tawak, engkerumong, ngepan asal, kain kebat, baku tangkin, genuk enggau gerugum.

“Tu mega nyengkaum sekeda keresa lama bukai ti jarang dipeda tauka dikembuan ba bilik penaik kitai bansa kemaya hari,” ku iya temegah enggau pemisi diri.

Penatai keresa lama tu mega endang diulih ari pelilih menua Layar, Paku, Skrang, Padeh enggau ke bukai.

Pengankun madi kitai Edmund begiga enggau ngumpul keresa lama tu endang patut dipuji enggau diteladan sereta nyadi buah kenang ditampung ngagai rebak baru.

“Aku empu ngintu enggau nyaga rumah muzium tu, nyengkaum keresa ke bisi ditu. Aku mega nyadi maling temuai, meri penerang enggau sanding penemu, madah silik ngagai sida ke bisi datai pasal penatai, nama enggau guna keresa nya.

“Belebuh mega bala kaban ari KBN datai kitu nyaup aku lebuh bisi pengawa di luar tauka maya mindah ke bukai,” ku Edmund.

Ari penemu Edmund empu, juluk ati iya endang deka ngangkatka rumah muzium nya diangkat nyadi palan ditapatka temuai enggau produk dagang temuai kelimpah pematak temuai di Sarawak, kelebih agi di Betong.

“Nyangka tu rumah muzium keterubah didiri tauka ditumbuh orang ngatika diri baka aku, nadai bantu belanja ari raban bukai, endang ari inisiatif diri empu laban dibai ati keran, angkun ngibun keresa lama.

“Juluk ati chukup besai, aku deka meda rumah muzium tu dikelala, tebilang sereta pegari nama baka rumah muzium bukai, dilawa mensia mayuh lalu sida deka bulih penemu baru ditu.

“Aku temegah ati meda asil ari pengawa diri, ngintu enggau nyaga keresa lama kelimpah ulih belapang ati ari timbal udah diterima ngelama tu lalu aku minta mensia mayuh anang sanggu datai nemuai kitu.”

Nangkan nya, Edmund meri peransang ngagai mensia mayuh ti rinduka keresa lama kitai Iban, kelebih agi bala nembiak sekula tauka pelajar di palan pelajar tinggi menua tu bela datai ngusung rumah muzium nya, meda lalu berati seraya ngiri penemu enggau penerang sereta ngaga pansik silik agi pasal keresa lama ke bisi dipandang dia.

“Nya alai aku keran endar ngelalau sereta meransang orang bukai, kelebih agi rebak baru enggau sida ti nampung pelajar di palan pelajar tinggi di menua tu ngereja pengawa enda ngira bidang enggau naka pengekih sereta ngembuan pengeliat ati belajar sereta mansik pesaka ke bisi.

“Tetiap pekara enti diadu memanah, betul chara, tau ngemai pemaik ngagai semua orang, kelebih agi ba pengawa baka dikereja aku diatu, semua tu ungkup rebak dudi,” ku Edmund nyimpul kenang diri.

Nitih ku penerang, rumah muzium tu nerima penatai mensia mayuh ninting hari lalu jam mega nadai ditatak.

Sapa bagi ti deka nemuai ngagai Rumah Muzium Ulu Padeh telefon nuju Edmund Rintai empu ba 019-8676801 kelebih agi betanya pasal penemuai ngaga pansik pasal ngepan Iban.