Nadai asai pedis betuchuk vaksin – Muhyiddin

PUTRAJAYA: Menteri Besai Tan Sri Muhyiddin Yassin bekunsika utai diasaika iya pengudah dituchuk vaksin Covid-19 nandaka Program Betuchuk Vaksin Covid-19 Nasional udah berengkah dipejalai sehari tu.

“Nadai asai pedis pengudah dituchuk vaksin, asai kitai ke betuchuk baka ngelama tu mih iya.

“Anang irau enggau nangi, datai mih betuchuk vaksin sebarang maya,” ku iya ba pengawa betuchuk vaksin ti dipanchar terus ba stesyen televisyen.

Muhyiddin madahka diri berasai lantang ati laban udah betuchuk vaksin lalu bisi pengandal vaksin nya likun sereta semitan.

Nya alai, iya ngelalau semua rayat sereta sida ke diau ba menua tu rejister nengah aplikasyen MySejahtera ngambi nentuka gintir sida nerima vaksin nya.

“Kitai mesti andal enggau pechayaka semua inisiatif dipejalai perintah tu nentuka kitai ulih mukaska Covid-19 lalu kitai deka mujur ngereja program tu.

“Sekali agi aku ngelalau semua kitai sama nyukung inisiatif tu nentuka igi penyakit Covid-19 ulih pukas ba menua tu,” ku Muhyiddin.

Suara Sarawak