Nadai betupi kelida, siku lelaki bebadi nyawa dilantak

SIBU: Siku orang tuai bebadi nyawa ba penusah ke nyadi ba Jalai Sibu – Durin lemai kemari.

Niang Bada Agong, 61 taun, ari Rumah Philip Kayak, Sungai Durin, parai tekala nya ba endur penusah nyadi laban balat bakal ketegal nadai ngena tupi kelida.

Kepala Polis Pelilih Sibu ACP Stanley Jonathan Ringgit ngenukuka penusah nya ba sebengkah penerang malam tadi.

“Lebuh penusah nyadi urung pukul 4.30 lemai nya, niang bemotosikal kediri lalu nadai ngena tupi kelida dilantak sebuah entukar bansa SUV.

“Pansik tumu tetemuka niang ngena motosikal dipelaba deka tama simpang ngenyit nukar jalai ari kiba ke kanan.

“Ulah niang nya ngujungka entuar SUV datai lurus nengah jalai kanan ari Sibu Jaya ke Kanowit ti nengah Jalai Sibu – Durin udah ngelantak iya,” terang Stanley.

Stanley madah, niang ke balat bakal pengudah dilantak lalu parai tekala nya ba endur penusah nyadi udah ditukuka raban perubat ari Sepital Sibu.

“Kes nya dipansik di baruh Seksyen 41(1) Akta Pengangkutan Jalan 1987.”

Suara Sarawak