Nadai kala bechiping ngagihka belanja

SARATOK: Penyampau agih belanja ke diberi ngagai rumah panjai tauka genturung pendiau bepanggai ba guna peranak ke diau dia.

Sapit Menteri Pengeluar Kuasa enggau Pengeraja Asal, Ali Biju madahka belanja diagih ngelama tu endang beratika peminta nitihka pematut.

Ku iya, sekeda belanja nya diberi mega meda ari penyampau tubuh enggau pemanjai rumah panjai enti sema nya diungkupka Komiti Pemansang enggau Pengelikun Genturung Pendiau (JKKK).

“Ambika chunto, enti rumah panjai nya kurang ari 20 pintu bilik enda patut kitai meri bela penyampau baka sida ke 30 tauka 40 pintu.

“Pia mega enti aktiviti diatur begunaka belanja ke besai, kitai deka beratika empas aktiviti nya ngagai pengelantang komuniti dia tauka sida ke diau ngelingi nya.

“Penyampau belanja diberi tentu deka bebida lebih agi ngaul guna ba aktiviti JKKK, Biro Indu enggau ke bukai. Semua tu bisi kebuah lalu tu ukai reti kitai bechiping lebuh meri belanja,” ku iya.

Jaku Ali nya disebut pengari iya, ex-pengajar Walter Changgai rambau pengawa nyuaka geran Projek Mit Pemansang Menua Pesisir (MRP) di Rumah Desmond Sunggan Chundi, Kemidan Jaya ditu, malam kilah ensanus.

Iya ke mega Kaban Parlimen Saratok nyemetak madahka agih belanja ungkup aktiviti pemansang JKKK enggau Biro Indu nya bebida ari belanja projek pemansang infrastruktur pemun baka nyemin enggau melakin jalai, ngaga jematan enggau ke bukai.

Beserimbai enggau nya, Tuai Rumah Desmond ngarika sida serumah nerima chek RM30,000 ari Walter ungkup aktiviti pemansang JKKK seraya Biro Indu nerima RM6,000.

Nambahka nya, Ali ke mega Adun Krian udah ngemendarka peminta PA System berega RM5,000 ungkup penyikap perengka guna ba rumah panjai nya.

Berita penuh Ruai 6 sehari tu.