Nadai kes rabies ari 518 kes ketup ukui dirikodka MPP

KUCHING: Bisi 518 kes kena ketup jelu dirikodka ba sitak Kaunsil Pelilih Padawan (MPP) berengkah 3 Januari nyentuk 25 April tu.

Taja pia, Chairman iya Lo Khere Chiang madah, nadai kes kena rampit igi penyakit rabies dirikodka ba timpuh empat bulan nya.

“Ari penyampau kes nya, 55 peratus tauka 286 kes nya diketup ukui diinang.

“290 iku ukui nya ditangkap Unit Jaga Ukui MPP ba tiga bulan keterubah taunt u.

“Kebuah pia laban tiap tiga bulan, ukui tu suah ngadaka semilan iku anak,” terang Khere Chiang.

Khere Chiang mansutka jaku nya ba aum pemberita pengudah Aum MPP, ditu kemari.

Iya mega ngelalau mensia mayuh anang meri ukui lelang nya makai lalu ukui nya mesti ditangkap raban penerit adat enggaika mai igi penyakit nya.

“Seagi igi penyakit tu bedau punas, ukui ti udah ditangkap nya enda ulih diambi pengempu iya agi ngambi ukui ti ditemu bisi penyakit rabies enda ngerampit sida ke nginang ukui nya.

“Baka ke ditemu kitai, 99.9 peratus sida deka bebadi nyawa pengudah diketup ukui ti bisi igi penyakit rabies.

“Nya kebuah ukui ti diinang kitai mesti dituchuk vaksin antirabies lalu anang ngelepas ngambi nagang igi penyakit tu,” ku iya nerang.

Khere Chiang mega ngelalau pengempu ukui nya mesti nentuka ukui sida dikurung dalam rumah lalu dituchuk vaksin.

Suara Sarawak