KUCHING: Perintah Besai semina deka nyiri Chairman Kaunsil Pengatur Pengawa Genturung Pendiau Komuniti (MPKK) ba genap genturung pendiau lalu ukai ketuai raban bansa tauka tuai rumah.
Penerang tu dipansutka Sapit Menteri Pemansang Menua Pesisir Sivarasa Rasiah ba sebengkah penerang berita ditu tadi.
Ku iya, sida nadai niat malut diri ba pengawa nyiri tuai rumah tauka ketuai raban bansa ti udah dichiri Perintah Sarawak di baruh Community Chief and Head Ordinance 2004.
“Chairman MPKK ke deka dichiri Perintah Besai deka gawa ngenegap sereta ngemanahka agi atur pengawa ba genturung pendiau nya.
“Batang tuju MPKK ditumbuh ngambika program pemansang dipejalai Besai bela diasaika semua rayat Sarawak kelebih agi raban diselinting ba renggat baruh,” ku iya madah nyemetak.
Jaku dipansutka iya lebuh berandau enggau pengari rayat Parti Keadilan Rakyat (PKR) ba Kuching kena 15 September tu tadi udah ngasuh orang saru penemu kelebih agi bala pemesai ari Perintah Sarawak.
“Pekara ti madahka Perintah Besai nguji deka ngasuh rayat renggat baruh pambar nengah pengawa nyiri dua iku tuai rumah nya penemu enggau peragam ti salah.
“Mayuh sida saru penemu ketegal jaku nyiri ketuai laban aku nadai madah deka nyiri tuai rumah tauka ketuai raban bansa bukai tang semina nyiri chairman enggau pangku pengawa bukai ba MPKK aja,” tandu iya.
