Nadai niat nyeriri Azmin

MELAKA : Presiden PKR Datuk Seri Anwar Ibrahim nyemetak iya nadai niat nyeriri Mohamed Azmin lalu ngujungka Menteri Pekara Ekonomi nya enggau 22 MPP ninggalka palan aum maya pengawa mantaika penemu kemari.

“Aku ngenang cherita ‘Si Kitul dan Raja Mendeliar’, aku nadai niat deka medis ati sapa-sapa. Tu Melaka, tu sejarah ke dikarang dalam Sulalatus Salatin, aku mantaika (cherita tu) laban bisi ajar, iya nya runtuh Kota Melaka ketegal petenah enggau pengawa ngelaban pangan diri, tu mih penyai petenah ngagai menua, tu batang ajar ari nya,” ku iya.

Anwar mega mesan raan ketuai enggau deligit ngambika besabar nyema bisi ngembuan penemu ke bebida sereta anang ngaga pemutus ti ngujungka pekara enda disadang, tang patut bai isu nya enggau chara berandau manah.

“Kitai nemu partu tu tumbuh ari ngelatih kaban awakka nyadi mangah, enda ngeri. Tang deka mangah, ngering diri, deka ringat ulih, tang chara bekaban mih.

“Nyema bisi enda sepenemu, bebida penemu, bisi ringat, bisi pansut, nya semua kitai sebilik, kaban parti kitai, kitai enda ulih nyelapka semua pekara manah ketegal pengeringat ti enda lama, nyadi aku ngarap besabar,” ku pesan iya rambau nutup jurai Kongres Nasional PKR ditu, pagi tadi.