BINTULU: Gerempung Pemansang Dayak Bintulu (Bangun) udah mujur nganjung bantu barang pemakai ngagai 24 penerima ba sebelah pasar Bintulu enggau sebuah rumah panjai ke napi penusah ketegal pengerekai pandemik Covid-19.

Sida ke dibantu tu mungkur sebilik suwa atas kedai The Chef (siku), rumah suwa Taman Kemena Sutera (dua iku), RPR Sibiyu (tiga iku), Rumah Suwa Ah Nong (dua iku), Rumah Suwa Batu 5 (tiga iku) enggau Rh Degom Kuala Puti, Ulu Kakus di Tatau bisi 13 iku penerima.

Chairman Bangun, Thwaites @ Twet anak Langak madahka program ti bepelasarka rambai jaku ‘Nadai Siku Orang Patut Diteju Lapar’ udah mujur dipejalaika dua hari berunggu kena 25 enggau 26 September tu tadi nengah kerejasama raban MakanKongsi 2.0.

“Bantu bekal pemakai tu dikena ngelempung tating penusah ke ditapi raban diselinting baka indai tunggal sereta raban tu putus batang pengawa ketegal pandemik Covid-19.

“Pia mega bantu tu dianjung nuju raban ti enda ulih pansut bebelika barang pemakai ke pasar ketegal Atur Mindah Betagang Dipekul (PKPD),” ku iya madah nengah sebengkah penerang nuju Ruai Suara Sarawak.

Nangkan ke nya, Thwaites madah raban Bangun ke ngemujurka pengawa nganjung bantu ke Rumah Degom bisi 10 iku lalu pejalai ngelawa menua nya ngambi awak pengelama lapan jam ungkup mansang enggau pulai ngena entukar pikap (4WD).

Pia mega, iya meri besai terima kasih ngagai semua raban ke bela udah nyuaka tulung nyukung Program Bantu Pemakai tu.

“Meri terima kasih mayuh ngagai sukung enggau tulung ari MakanKongsi 2.0 enggau orang siku-siku ke udah meri sukung ari segi belanja dikena ngemujurka program tu.

“Bangun naka ulih mantu raban ti tusah sereta begunaka bantu pemakai bepanggai ngagai pemisi gerempung,” ku iya.

Sebedau tu , Bangun kala ngemujurka program ti sama kena 11 Julai ngagai Anthony anak Munang ti putus pengawa ketegal dituntung penusah enda disadang maya gawa.