Nadai orang melanja PBK

KUCHING: Parti Bumi Kenyalang (PBK) ngenggaika semua peragam ti tau ngamahka nama parti sida.

Presiden iya, Voon Lee Shan madahka bisi sekeda kimpin disadung nengah aplikasyen Whatapps ngumbai PBK dipelanja sekeda kaban politik bukai ti bekerejasama enggau Pakatan Harapan (PH), GPS tauka Barisan Nasional (BN).

“Kandang beberapa bulan ke udah, kami nerima mayuh sukung ari mensia mayuh ba pengawa ditegika kami mai Sarawak bisi kuasa merintah diri empu.

“Nadai ngasuh aku alit ati enti PBK udah dikelala rayat Sarawak tang beberapa minggu ke udah, sida sepiak nyin baka nguji nyekat parti tu tumbuh besai agi,” ku Voon.

“Aku ngarika PBK deka nerang ngagai mensia mayuh ke alai parti tu nadai dipelanja sebarang orang tauka piak ti bekerejasama enggau PH, GPS tauka BN baka ti disebut sebedau tu,” ku iya nerang ba aum penerang berita, kemari.

NEGIKA SARAWAK MERDEKA… (ari kiba) Awang Badele, Voon Lee Shan, George Martin, Peter Asut enggau Chai Kueh Khun rambau aum pemberita kemari.

Kenu ku Voon, PBK semina fokus ba siti tuju aja diatu iya nya ngulihka kuasa Sarawak megai perintah nengah konstitusyen di baruh undang-undang menua tu tauka antarabansa.

“Dikena nyapai juluk tu, PBK enda deka bekerejasama enggau PH tauka sebarang parti politik ari Malaya.

“PBK mega patut ngatika diri ari dibalut GPS laban parti nya kala nyadi gempung BN suba lalu sida enggai meda Sarawak sebuah menua ti megai perintah diri empu.

“Tambah mega, pengawa ditegika GPS ngulihka hak otonomi Sarawak enda ulih nyaga semua hak Sarawak,” ku iya madah nyemetak.

Voon mega madajka GPS patut nemu Sarawak deka lenyau hak nitihka pematut laban Malaya bejalaika polisi ‘penjajahan manusia’ enggau ‘imperialisme ekonomi’ ke alai mayuh rayat Sarawak deka lenyau identiti enggau enda ulih matau ekonomi menua tu.

Dominasyen tauka kuasa ari Malaya pasal main asal, pengarap enggau gaya idup rayat Sarawak lalu tu tau ngasuh peranak ti ada ba kandang menua ulu lenyau identiti asal sida.

Voon mega nerang orang Sarawak diingatka pasal pekara ti benung nyadi ba Sabah diatu ke alai mensia mayuh muntang ngulihka tingki Malaysia taja sida enda ada dia.

“PBK mega beratika Perintah GPS alah penemu laban Malaya berani negu pekara dagang enggau tanah rayat ditu.

“Sebedau tu, imperialisme ekonomi Malaya ukai semina ngasuh Sarawak lenyau pengaya ba kandang tasik, hak minyak enggau gis aja tang mega sepeneka bejualka tanah adat ngagai serikat besai di Malaya sereta sebagi ari tanah Sarawak ngagai Perintah Besai,” ku iya.

Nitih ku iya, menua kitai lenyau asil ketegal diambi tauka dijual ngagai perintah besai manggai RM1 bilion sehari lalu penyampau tu ukai mimit.

Nya alai pengawa ditegika GPS semina mungkur kuasa otonomi aja tang ukai negika Sarawak merdeka lalu tu enda ulih diterima kami PBK, ku iya.

“Nya mega kebuah kami PBK naka diatu enda deka ngaul kerejasama enggau GPS tauka PSB,” ku Voon nerang lebuh dirandau Suara Sarawak.

Ku iya, taja PSB parti datai ari menua tu tang PBK agi rapas penemu kini kuing PSB naka diatu lalu bisi jaku ngerimbas pending ngumbai PSB baka rindu agi mantu PH ngelabuhka GPS maya PRN deka datai.

Taja pia, Voon mega nerangka PBK enggai meda PH megai Perintah Sarawak dudi hari laban ba penemu sida, Dap enggau PKR enda ulih nyaga hak ti bisi di Sarawak sereta deka ngasuh mayuh agi rayat ditu asa.

Sama datai Mandal Presiden PBK Peter Asut, Awang Badele enggau Dato George Martin disempulang Chai Kueh Khun.