Nadai peneleba ngajar, arus internet lubah nyadi penanggul PdPR

KUCHING: Pengawa Ngajar enggau Belajar ari Rumah (PdPR) bisi dipetalatka mensia mayuh kenyau iya dipejalai kenyau 20 Januari tu tadi ketegal pengerekai Covid-19.

Sekeda nyukung PdPR tu, lalu bisi mega enda besetuju ketegal napi pemar lebuh ngajar anak belajar ari rumah.

Suara Sarawak bisi nanya siku indu nusi peneleba diri sekumbang bejalaika PdPR enggau anak.

Ku Petla Arwinna ari Bakong, Miri pengawa ngajar anak ba rumah ukai pekara ti muntang laban begunaka penyabar ti tinggi.

Indu beumur 29 taun tu nusi enti enda ketegal PKPB anak iya besekula ba tadika SK Kilang Kelapa Sawit No. 2.

Petla Arwinna.

“Kami apai indai nadai peneleba sereta ngembuan penemu baka raban pengajar tang ketegal PdPR kami enggai nyadi enda ngajar anak nangika anak tinggal pelajar.

“Siti pemar ti ditapi aku maya ngajar anak ngena sistem PdPR iya nya line internet enda kuat, nya ngujungka pelajar anak aku bisi penanggul,” ku iya.

Ku iya, ketegal line internet lubah, anak iya enda ulih meri fokus belajar baka di sekula laban chara anak mendingka jaku pengajar enda sebaka enggau chara anak mendingka jaku apai indai.

Tandu Petla, iya endang andal agi enti anak belajar ba sekula betemu mua enggau pengajar.

“Lebuh nitihka PdPR anak semina nitihka kereja ti diberi pengajar lalu ngaga kereja nya tembu aja.

PdPR..Anak Petla benung nembuka kereja sekula ti diberi bala pengajar ungkup PdPR.

“Nya enda meri pangka besai ngagai kualiti belajar sida iya.

“Kelimpah ari nya, lebuh belajar anak napi penanggul dikachau bala menyadi iya ke bukai,” ku iya nusi.

Taja pia, Petla madahka iya enggau naka ulih mantu anak iya nitihka PdPR ti udah ditusun raban pengajar.

“Ketegal Covid-19 kami apai indai endang sigi nangika pengerai anak maya besekula.

“Ngarapka aku ulih mantu anak belajar enggau manah taja mayuh pekara pekara nekul.

“Aku meri terima kasih ngagai bala pengajar ke udah ransing meri kereban pelajar sekumbang PdPR tu,” ku iya.

PdPR nyadi isu lebuh mayuh palan di selampur Sarawak napi pemar nadai line internet ti kuat kelebih agi menua pesisir ti tebal agi diuan bansa Iban ba rumah panjai.

Pekara tu nerima perati ari sekeda gerempung nyengkaum Serakup Pengajar Sarawak (STU), Serakup Pengajar Bumiputera Sarawak (KGBS) enggau Gerempung Pemikir Dayak Sarawak (DTTAS).

Suara Sarawak