“Sida (perintah besai) sebedau tu udah setuju ngena chara bayar kontra RM1 bilion, tang enda ngamatka semaya nya pengudah beratika pekara tu nadai pemaik ari sukut politik sida.”
KUCHING: Sepenyampau 1,020 sekula repuk di Sarawak ngandalka bantu belanja disemaya perintah.
Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah madah, agi tubah sekula repuk di Sarawak.
Ku iya, penanggul tu nyadi tanggungpengawa Perintah Besai nengah Opis Menteri Pelajar Malaysia (KPM) nambahka penyikap perengka guna enggau nyeleti begunan sekula nya.
“Ulah KPM ngasuh alit ati lalu nama niat Perintah Besai ba pengawa deka nyeleti sekula repuk di Sarawak.
“Sida (perintah besai) sebedau tu udah setuju ngena chara bayar kontra RM1 bilion, tang enda ngamatka semaya nya pengudah beratika pekara tu nadai pemaik ari sukut politik sida,” ku iya pengudah aum pengarang berita Pengerami Jazz Waterfront Kuching (KWJF) 2019, kemari.
Iya madahka diri asa ngagai bala MP Pakatan Harapan ti diau diri di Kabinet lebuh KPM mantaika penerang nulak chara bayar kontra RM1 bilion dikena mutar isu sekula repuk di nengeri tu.
“Ulah sida tu ngachau pemansang sekula ditu taja sida nemu agi tubah sekula betapi enggau penanggul tu.
“Aku mega udah ngena belanja diri empu ungkup dua buah sekula ba sitak aku, penyampau lebih RM2,000,000 genap sekula nya,” ku iya nambah.
Ku iya, sebedau tu sida madah nadai belanja lebuh peminta agih belanja mutarka isu nya dibantai.
“Diatu, udah datai ba jam kitai bisi belanja ti chukup, sida enda setujuka chara kontra nya,” ku iya.
