KUCHING: Belajar enggau nunda pengelandik indai beranyam, Hilda Tiang entara pedagang kraf kantung ti majak angkat ba menua tu.
Indu Penan nya madahka diri nyual bemacham bansa kantung dianyam ngena tali kutak baka totebag, square base, clutch enggau slingbag.
Bai ati keran ngangkatka produk kraf diri ngambi dikelala ba tikas entarabansa, dia iya mega bisi ngaga kantung sandik, lupong enggau gaweng ari bila wi.
“Aku teulihka runding ngepunka dagang tu pemuas ke meda enggau nulung indai beranyam enggau nyual kantung kenyau ari mit. Asil bejual nya meh dikena indai nyengulaka kami semadi.
“Tembu belajar komputer, aku mantaika semua produk dianyam indai ba online lalu pengalus anyam jari indai narit ati siku peranak Singapore benama Michelle,” ku iya ngepunka kenang diri.
Hilda, 31 taun, madahka udar pemadu baru diterima iya ari siku peranak Brunei benama Azariah dalam bulan nyin siti nyin tadi ti meli mayuh sekali.
NYAGA PENULIN
Produk kraf iya nyelai ari orang bukai laban agi ngemeranka ukir enggau chura asal lalu dilagu ngena utai bukai ngambi tampak eksklusif sereta moden enggau rega ke patut.
Iya madahka diri udah tiga taun bedagangka produk krafjari ba kedai di Borneo Heritage Handicrafts Centre, Miri pengudah nampung dagang dipunkal indai iya.
Ku Hilda, semua produk nya dianyam indai iya lalu iya mega bisi nyaup nengkebang kantung nya.
Iya madahka timpuh beranyam enggau nengkebang produk nya bepanggai ngagai ukir, chura enggau pemesai iya.
“Enti beranyam baka selama aja, sehari aja pen kami duai ulih nembuka kantung nya.
“Entara kereban diguna dikena nengkebang kantung tu baka wi, tali kutak, hos, pemegai buluh, pemegai leather, sticker, kain, injin jait, zip, gam enggau lungga dikena melah tali.
“Wi nya digiga kami duai indai ari kampung lalu produk tali kutak nya ulih dibeli ba kedai.
“Kami duai deka ngiga wi nya pengelama seminggu dataika ulih dikena beranyam lalu enti tali kutak nya sehari aja laban dibeli ba pasar,” ku Hilda nerang baru.
KREATIVITI NENTUKA REGA
Nambahka nya, ba dunya dagang kraf tu, bemacham pemar ditapi nyengkaum besemekih enggau pedagang bukai ke bejualka produk sebaka.
Nya kebuah ku iya, sida mesti bisi pengelandik enggau kreativiti nentuka produk kitai nya narit ati mensia mayuh.
Baka pedagang bukai, Hilda madahka dagang iya kusut ketegal pandemik tu ke alai sebedau pandemik, untung dalam RM3,000 ngagai RM5,000 sebulan.
Taja pia, maya pandemik tu dagang iya bisi kusut, semina bulih untung RM1,000 ngagai RM3,000 aja lalu produk pemadu laku iya nya kantung dianyam ari tali kutak.
Naka diatu, Hilda ngena tiga pelasar digital dikena ngelakuka dagang kraf tub aka ba Facebook pages Mama’s Handicraft, ba Instagram REKEN enggau Mamas Handicraft enggau ba Carousell Mamas handicraft.
RURUN NGANYAM WI
Ngelansa pasal chara beranyam, Hilda madah, terubah nya deka ngiga wi ngagai kampung dulu lalu meresika duri tauka dikumbai kami mohot wai.
“Udah nya, kitai deka netak batang wi nya nitihka pemanjai dikedeka kitai lalu proses tu dikumbai kami nyatek.
“Semua batang wi nya deka disan bai pulai enggau tiap batang wi nya deka diperesa lalu proses tu dikumbai kami nyeluti.
“Batang wi nya deka dibelah enggau ngeraut bila wi lalu tu dikumbai kami memilak enggau mae.
“Kami deka ngerebus wi enggau daun khas ari kampung dikumbai matok ihat sebedau diunsut ngena tanah ladu ke dikumbai ngelinak ihat.
“Pengudah semua proses nya, tejuka wi nya semalam-malam sebedau ngirah wi ke diunsut ngena tanah ladu lalu dijembui dataika rangkai.
“Udah wi nya rangkai, baru kitai berengkah nganyam kantung lalu genap proses nya beguna amat nentuka wi nya tan lama,” terang Hilda sentang proses ngiga wi dataika beranyam.
Iya madahka raban Opis Pengintu Pengelantang Mensia Mayuh (JKM) ke balat meransang iya ba dunya dagang tu laban suah mantu enggau nyaga booth indai iya lebuh bisi eksibisyen diatur JKM.
Kelimpah ari nya, Hilda madahka JKM mega udah nyuaka geran RM5,000 nyadika puku iya ngepunka dagang kraf tu.
