PENGAWA betanam kulat deka ngenataika mayuh penguntung kelimpah dikena nambahka penatai pemisi, pia ku Mohammad Zakaria Jamsari 36 taun asal ari Kuching.

Zakaria ransing ngaga Rumah Kulat Tiram Kelabu ti dikemansang iya kenyau ari dua taun ke udah laban iya endang rindu bekebun.

Pia mega, iya bisi belajarka chara nyaga kulat tu nengah penerang ba Youtube.

Pengawa nanam kulat tu semina rindu aja lalu ukai nyadika batang pengawa iya.

Tang iya berasai gaga laban pengawa tu mansutka asil urung RM1,000 sebulan.

BELAJAR ARI YOUTUBE

Mohammad Zakaria Jamsari tauka suah agi dikangau Zack, iya madahka diri nguji nanam kulat ba 10 repu kayu dulu sebedau nambah mayuh agi.

Iya madahka diri nguji meli 10 repu kayu lalu belajarka chara nanam kulat ari Youtube.

“Udah nya, aku nambah baru 20 ngagai 50 repu kayu lalu ditaruh ba dapur.

“Suba, kulat ti udah manah diambi nya lalu disumai indai ke lauk kami sebilik.

“Ari nya, aku belajar bakani deka ngintu kulat tu ngambika bebuah manah,” ku iya lebuh dirandau pemberita ba rumah iya, apin lama ke udah.

Taja gawa ba sebuah serikat peribit, Zack endang ngintu kulat nya nyentuk diatu laban iya ngasaika kulat nya mesti diintu manah ngambi ngasilka kulat ti manah.

“Maya ujung minggu, aku endang tumu dani lalu mandi sebedau ngemasah mimit papan rumah kulat tu nyengkaum ngelingi repu kayu nya.

“Udah nya, aku ngambi kulat ti udah manah diambi enggau nungkus kulat nya sebedau dianjung ngagai bala penguna ti udah ngudar kulat tu.

“Pengudah kulat nya tadi diambi, urat ti tumbuh dalam repu kayu mesti dibuai dulu.

“Pengudah urat kulat dibuai, repu kayu tu deka dilak pengelama seminggu dulu,” ku Zack nerang sentang rurun nanam kulat baru.

“Kadang, kami sebilik mega nyaup aku nungkus kulat ke deka dianjung ngagai bala penguna,” ku iya seraya madahka diatu iya benung nanam kulat ba rumah kedua,” ku iya.

PEMINTA TINGGI

Iya madahka diri nerima sanding penemu ari bakih iya lebuh ba taun keterubah ngepunka dagang kulat tu.

Ari nya, Zack berengkah ngulu kus ti disediaka Institusyen Betanam Betupi enggau Mardi.

Pengudah suah ngulu kus, iya lalu nirika rumah kulat keterubah laban sedarka pengawa nanam kulat endang ngenataika untung besai kelimpah nerima peminta tinggi.

“Pengudah dua taun aku ngepunka pengawa nanam kulat tu, aku endang nerima peminta tinggi kelebih agi ari bini orang nadai kereja,” ku Zack nerang.

“Sida endang nyadi penguna tetap aku kenyau ari rumah kulat keterubah suba.

“Abis nadai aku ulih nanam kulat ba 1500 iti repu kayu lalu tebal agi, ukai semua kulat deka tumbuh,” ku iya nerang.

“Lebuh bisi ati deka nanam kulat tu, kitai patut nyikap diri enggau penemu betanam betupi,” ku iya.

Terang Zack, kitai patut nemu pekara ke patut diseliah baka kulat tu mudah ensium bau.

Nya kebuah ku iya, barang sapa ti ngena minyak angi anang tama ngagai rumah kulat tu enggau anang nunu uras semak rumah kular tu tadi.

Beduduk ari nya ku Zack, iya deka mandi dulu nadai ngira tumu pagi tauka baru pulai kereja sebedau tama ke rumah kulat.

“Kulat deka tasal tauka mudah jai enti ensium bau baka minyak angi, bau nunu uras enggau ke bukai,” terang iya sentang pekara patut dikemerat sebedau tama ke rumah kulat.

PEMAR SEKUMBANG PKP

Ngelansa silik, Zack madahka diri napi penusah sekumbang Atur Tagang Pejalai (PKP) laban mayuh kilang kayu ditutup enggau nadai pemekal kayu dikena ngaga repu kayu ti baru.

“Kulat nadai mansutka mayuh asil sekumbang PKP laban siti repu kayu semina ulih mansutka asil kulat enam ngagai tujuh kali aja.

“Aku nadai bulih repu kayu baru ketegal kilang kayu ditutup,” tandu iya.

“Tang diatu kilang udah dibuka baru lalu semua utai diguna dikena ngaga repu kayu endang bisi ba kilang kelimpah aku mega bulih semua kereban diguna nya ari bakih aku,” ku iya ti madahka diri lantang ati pengudah kilang udah dibuka baru.

Lebuh dirandau ba rumah kulat kedua asil geran RM15,000 diterima nengah Agropreneur Biak 2019 ari Mardi apin lama, Zack merambu nanam Kulat Tiram Putih ba rumah kulat keterubah ke enda dikena agi.

“Suba, rumah kulat keterubah nya beungkus RM10,000 nyengkaum jemari nyimpan kulat.

“Diatu, rumah kulat kedua nya patut ngembuan pengelebih nentuka kulat ulih tumbuh manah.

“Tu nyengkaum rumah nya enda tau enda petang enggau lindap,” ku iya madahka rumah kulat kedua tu nunjukka pemujur iya ba dagang kulat.

“Kulat ti tumbuh deka chelum agi enti rumah kulat nya petang enggau kulat deka tumbuh burak agi enti kena panchar mata panas baka kulat Tiram Putih,” ku iya nerang silik.

Zack madahka diri lantang ati laban sekumbang lebih dua taun ba pengawa nanam kulat tu, iya nerima mayuh bantu kelebih agi piak Mardi enggau ejensi bukai.

Ku iya, sida mayuh meri bantu ari sukut sanding penemu nentuka kulat ulih tumbuh enggau mansutka mayuh asil kelebih agi sida nyendiaka geran ungkup rumah kulat kedua tu.

“Rumah kulat keterubah tu endang ngena belanja aku empu nyengkaum bantu bala bakih ba pengawa ngaga dokumen ngambi aku bulih agih belanja ngaga rumah kulat nya.

“Taja pia, rumah kulat keterubah semina ulih engkah 1,600 iti repu kayu dibanding rumah kulat kedua ti ulih engkah 6,000 iti repu kayu.

“Aku ngena pelasar media rama baka Instagram, Wechat enggau Whatsapp dikena ngelakuka dagang kulat tu.

“Aku suah nyual 200 gram kulat tiram kelabu tu berega RM5,” terang iya sentang rega kulat.

Zack mega meri terima kasih ngagai bala penguna ti udah meli kulat lalu sabra nganti bekal kulat laban nya semina pengawa ujung minggu.

Iya mega madah, pekara pemadu beguna iya nya kulat nya agi baru enggau seruran diintu iya enggau manah.

PERANSANG DIRI

Nambahka nya, Zack ngarapka mayuh agi ejensi bukai ulih mantu nembiak enggau piak bukai ti deka ngaul diri ba pengawa betanam betupi.

Iya madahka bantu ti diterima nya nyadi peransang ngambi ransing agi ngemansangka aktiviti betanam betupi.

“Kelimpah ari sanding penemu, aku ngarapka ejensi bukai ulih mantu nyendiaka geran ungkup pedagang kulat nyengkaum bantu nyendiaka kereban bukai,” ku iya ti mega betanam chara hidroponik.

Pia mega, Zack ngarapka sida ti putus pengawa ulih ngaul diri ba pengawa nanam kulat dikena nambahka penatai pemisi diri.

“Kami keran ngemansangka utai tanam tu taja kami nemu penyakit kulat entara pemar besai laban kami nemu dagang tu ngenataika untung besai.

“Kami mega deka belajar nengah Youtube enggau bala ti udah mujur ba dagang kulat ngambi ulih nyadi pedagang ti mujur dudi hari,” terang Zack.

Kelimpah ari nya, iya andalka peminta kulat ba makit menua deka nambah laban bemacham produk benung dikemansang ari kular nyengkaum keropok kulat, kulat guring enggau ke bukai.