Nanas Moris pemadu laku

MIRI: Nanas Moris sebengkah bansa nanas ti pemadu laku lalu nerima mayuh peminta ari bala pedaja enggau ‘pemborong’ barang dagang.

Melvin Ingan, iya nya siku pengereja ladang nanas di Samarahan madahka nanas Moris nerima mayuh peminta ari bala pedaja nyengkaum Kaunsil Makit Betanam Betupi Perintah Besai (Fama).

“Asai nanas Moris tu nyelai agi ari asai nanas baka N36.

“Enti nitihka ari sukut ngaga jus, semua bansa nanas ulih dikena tang ketegal ari rega nanas Moris ti murah, nya kebuah nanas tu mayuh pinta ari bala pemborong,” ku iya ti baru dua taun dalam pengawa bekaul enggau nanas.

Ku iya, nanas Moris ngembuan asai ti tajam lebuh diempa.

NANAS N36… Melvin nunjukka nanas N36 ke bisi dijual ba palan bedaja program JTDL & Industri Pengawa Bumai ditu.-Gambar Ghazali Bujang

“Taja pia, nanas tu mayuh peminta laban rega murah agi ari nanas ke bukai.

“Nanas N36 enda tajam sereta nyamai diempa tang rega enda sebaka enggau rega nanas Moris,” ku iya nerang.

Lebuh dirandau Suara Sarawak ba Program Jual Terus Ari Ladang (JTDL) & Industri Asas Tani, Melvin madahka sida ngembuan siti ladang tauka projek nanam nanas di Sungai Mata, Samarahan.

“Taun tu, kami udah nanam nanas ba tanah enggau pemesai 30 ikar.

“Nya nyengkaum 25 ikar dikena nanam nanas N36 llu lima ekar dikena nanam nanas Moris,” ku iya.

Nangkan nya ku Melvin, dalam seikar tanah, sida ulih mansutka 12,000 nanas, bepanggai ba saiz nanas empu.

“Taun baru kami deka nerenak nanas bansa MD2 ba pemesai tanah tiga ikar.

“Lalu smua bantu ngulihka paung MD2 tu endang diberi piak Kaunsil Nanas empu,” ku iya lebuh dirandau pemberita.

Berebak enggau nya, ditanya bekaul enggau bekal dibai ngagai pengerami JTDL & Industri Pengawa Bumai ditu, Melvin madahka pejalai stok sida ari Samarahan ngagai Miri dibantu piak Fama.

“Dalam pengerami tu, kami bisi mai 1,000 igi buah nanas, 1,000 paung nanas, 200 sos chili nanas lalu 100 butul jem nanas.

“Rega nanas ba makit biasa iya nya RM8 tang ba ditu, mensia mayuh ulih bulih rega RM5 sigi tauka RM10 dua igi nanas,” ku iya.

Kelimph ari nya, lebuh ‘happy hour sale’ mensia mayuh mega tau bulih rega ti jauh murah ari rega selama enggau rega ke udah ditetapka ba program tu.

Suara Sarawak