KUCHING: Joeyees Trading Sdn Bhd, serikat pemansut produk ari lada Sarawak chap dagang Nang Ori ngelancharka program baru iya nya Nang Ori Home Centre.
Nang Ori Home Centre nya dikena mantu bakih kunsi eksklusif (EPM) nambahka penatai pemisi.
Pia mega, Nang Ori Home Centre nya udah dilanchar Direktor Mara Sarawak, Dr Azmi Amat Murjan ba sebengkah Pengerami Makai Lemai Gala Nang Ori 2022, ensanus.
Ku Direktor Nang Ori Awaeng Kwasin, nengah Home Centre nya, pembeli ulih ngiga palan besemak meli produk Nang Ori nengah Google enggau Waze muntang, jampat enggau semak.
“Penguna aplikasyen Google Business enggau Wase udah nyadi siti ‘trend’ bala penguna diatu ngiga produk dikedeka sida.
“Sedarka aplikasyen nya, dia kami berunding deka numbuhka Home Centre Nang Ori yang dikena ngena pengelebih aplikasyen Google Business enggau Waze,” ku iya.
Sama datai Kaban Parlimen Puncak Borneo Datuk Willie Mongin.
Awaeang madah, naka diatu, Nang Ori bisi 20 palan nya dikena mantu lebih ari 5,000 agen tauka dikumbai EPM enggau 10 tuai sereta 10 iku VVIP EPM.
“Tebal agi raban indu nya bini orang ngintu rumah, indai tunggal ti deka nambahka penatai pemisi ari rumah nengah online lalu nyual produk ari lada Sarawak ngena chap dagang Nang Ori,” ku iya.
Kelimpah ari nya, Awaeng madah, serikat iya deka mantu peranak Rumah Panjai Nanga Seladong Ulu Skrang ngelakuka produk kraf jari sida ti enda dijual ngelama tu ketegal bisi penanggul.
Ku iya, penanggul ditapi peranak nya baka perengka pengangkut, nadai arus Internet, jauh ari pasar nyentuk pedis ngelakuka produk kraf enggau asil kebun sida.
“Aku udah ngulu pejalai Projek Pemansang Lada Premium diatur Kaunsil Lada Malaysia.
“Lalu lebuh ba Rumah Panjai Nanga Seladong, Ulu Skrang, dia aku sinu meda mayuh produk kraf baka kantung digaga ari wi Ini Sima tang nadai dijual.
“Peranak Rumah Panjai Nanga Seladong betanamka lada nyadi pun penatai pemisi sida.
“Maya musin pengujan, sida deka ngaga produk kraf dikena ngiga penatai pemisi tambah,” terang iya.
Nya kebuah ku Awaeng, serikat iya deka nampung produk dagang taun tu baka Produk Indu Mujur Bedagang Online, chabut tikit benasip bulih entukar Aruz, Ratu Kebaya, Roadmap to Hypermarket, Program (PIPU) Palan Ikubator Pedagang Online Nang Ori kelimpah Produk Komuniti enggau Ini Sima ari Ulu Skrang.
