Nasih tanah Jematan Krian dipenyadi 8 Okt

BETONG: Kepala Menteri Datuk Patinggi Abang Johari Tun Openg disadang bejadika pengawa nasih tanah Jematan Sungai Krian kena 24 September.

Nitihka penerang ari Komunikasyen Korporat Opis Kereja Raya (JKR) Sarawak ensanus, Abang Johari mega diperambu bejadika pengawa ti sama ba Jematan Saribas Pusa kena 8 Oktober tu.

Nambah nya, aum komiti pengatur pengawa nasih tanah Jematan Sungai Krian, Kaba enggau Jematan Batang Saribas, Pusa ti diketuaika Menteri Muda Jalai Pesisir Datuk Julaihi Narawi udah diatur beratika pejalai pengawa ba kededua projek nya.

Pengudah baum, Julaihi disempulang sekeda pemesai JKR ngatur pejalai ngabas taba projek Jematan Sungai Krian.

Perintah Sarawak udah ngagihka belanja penyampau RM11 bilion dikena ngagai jalai darat enggau jematan ba menua tu kandang lima taun.

Penerang tu dipansutka Sapit Kepala Menteri ti nyadi Menteri Pemansang Infrastruktur enggau Perengka Pengangkut Tan Sri James Jemut Masing apin lama ke udah.

Kenu ku iya, jalai darat ti nyambung mengeri besai di Sarawak disadang tembu nitihka timpuh.

Projek tu mega deka meransang pemansut ekonomi nyengkaum Rentayan Jalai Tebing Tasik enggau Jalai Kedua di baruh pegai Perintah Sarawak diatu.

Rentayan Jalai Tebing Tasik 896km penyauh enggau Jalai Kedua 235 km deka ngemandakka timpuh pejalai ari Kuching-Sibu, manggai dua jam setengah, deka dipejalai nengah tinda tebuka.

Nentuka pemujur kededua projek jalai tu, semilan batang sungai besai deka ditengah enggau projek jematan udah diperambu digaga dia.

Semua belanja projek jalai enggau jematan tu dipelanja Perintah Sarawak.

Ngelansa pasal projek Jematan Sungai Krian 690 meter pemanjai beungkus RM174 juta ditimpuh tembu ba taun 2022 seraya Jematan Batang Saribas beungkus RM496 juta enggau 1,500 meter pemanjai disadang tembu June 2023.