KUCHING: Ejensi perintah dilalau neleba diri ngereja pengawa ti inovatif sereta kreatif dalam organisasyen ngambi ulih majak mansang sereta meruan relevan.
Sapit Menteri Perambu Mengeri, Pengatur Tanah enggau Rampa Menua, Datuk Len Talif Salleh madah, nengah trend revolusyen industri pemadu baru, mayuh pemaik diulih ari inovasyen nya.
“Pengeranchak ekonomi enggau globalisasyen sehari tu ngenukuka pemesai guna nentuka polisi ti dipungkal bisi penteba inovasyen enggau kreativiti sereta meri pemaik ti engkeman ngagai semua rayat.
“Chunto ti udah dijapai sereta ditemu semua iya nya baka Projek Elektronik LASIS (eLasis) enggau Mobile LASIS.
“Inovasyen enggau pengelebih teknologi diatu dikena meri fasiliti enggau servis ba ujung jari ngagai rayat,” ku iya.
Len Talif nyebut pekara nya dalam jaku iya ba Aum Besai Raban Inovatif enggau Kreatif (KIK) Opis Menteri Pengeraja Asal enggau Pemansang Mengeri (MUDeNR) 2023 di Palan Aum Besai Penview (PCC) Demak ditu, kemari.
Ku Len agi, genap inovasyen enggau kreativiti ti diasil suah agi ulih mantu ngelimat awak enggau ungkus maya mutar sesebengkah isu enggau penanggul ba pengawa.
Ku iya, pengawa ngasil produk tauka sistem tauka penengkebang langkar deka ngemanahka agi sereta ngangkat kualiti ngenataika servis.
“Nya alai suah disebut organisasyen ti neleba diri enggau inovasyen sereta kreativiti endang organisasyen ti nyulut.
“Penyulut tu diasil laban inovasyen enggau kreativiti nya ulih mantu ngelimat jam enggau pengereja pengawa,” ku iya agi.
Inovasyen nya mega, ku iya, ulih ngangkat kualiti, ngurang pengilap, tampak agi sereta sikar seraya ulih muka makit baru ti lebih besemekih.
Ku iya, pemaik bukai ti diulih ari inovasyen iya nya pengawa nyaga pemanah rampa menua.
“Penengkebang kelia enda ngemeratka empas ngagai rampa menua, nya alai rebak diatu meseti sedar lalu belajar ari pekara ti udah nyadi.
“Rampa menua endang pun penatai besai pengeraja asal kitai ungkup pengidup kelebih agi ungkup rebak ti deka datai.
“Genap inovasyen sehari tu endang ungkup pemaik kitai enggau mega rebak ti deka datai sereta pengidup semua jelu ba dunya tu,” ku iya agi.
Iya mega andal pengawa nerenak daya inovasyen enggau kreativiti ba raban pengereja pengawa perintah meseti dikemerat lalu diambi positif semua renggat pengereja pengawa perintah.
“Semua pengereja pengawa enggau bala menijar atas MUDeNR, opis sereta ejensi ba baruh iya meseti ngenegap rampa inovasyen organisasyen diri empu enggau peransang inspirasyen sereta nerenak penemu baru, ngerembai penau ti udah bisi sereta nyerungkai pengulih inovatif enggau kreativiti pengereja pengawa ngagai renggat pemadu tinggi.
“Enggau chara baka tu baru inovasyen sereta kreativiti ulih ditegap lalu ngasil produk inovatif baru enggau sistem ngenataika servis ti bekualiti sereta bisi daya besemekih,” ku iya.
Direktor Tanah enggau Survei Sarawak, Datuk Abdullah Julaihi, Direktor Kampung Sarawak, Datuk Hamden Mohammad, Menijar Besai Kaunsil Pemansang enggau Pengintu Tanah Sarawak, Datuk Monaliza Zaidel, Menijar Besai Kaunsil Pemansang Kayu Ramu Sarawak, Zainal Abidin Abdullah, Kontroler Kualiti Rampa Menua, Kaunsil Pengeraja Asal enggau Rampa Menua Sarawak, Jack Liam enggau Tuai Pegawai Eksekutif Sarawak Forestry Corporation, Zolkipli Mohamad Aton mega bisi datai.
