KUCHING: Kolej I-Systems Kuching nyain Sempekat Pemereti Ati (MoU) enggau Raban Pengintu Pengerai Sunway (SHG) dikena nyendia sekularship penuh ngagai nembiak ti patut ngambi diploma pelajar indu misi.
Sekularship nya mungkur bayar penuh tuisyen, buding, kereban pengangkut, belanja idup, pekayan uniform, kasut, meresa pengerai, bonus akademik sereta belanja berubat pesakit dalam enggau pesakit luar.
Sapit Premier ti mega Menteri Pengerai Mensia Mayuh, Pengawa Berumah enggau Perintah Lokal, Datuk Seri Dr Sim Kui Hian madah, inisiatif MoU kededua raban nya dikeandal ulih mantu nambah penyampau indu misi seraris enggau peminta ba pengawa pengerai menua kemaya hari tu.
Ku iya, bala penerima sekularship ti dipilih deka bejalaika program nya pengelama tiga taun ba I-Systems sebedau sida dianjung gawa ba sebarang palan perubat SHG.
“Kerejasama raban pengintu pengerai enggau palan pelajar beguna amat laban kemaya hari tu, menua suntuk indu misi lalu tu balat ngirauka ati.
“Sekularship tu dikeandal ulih matak mayuh agi nembiak milih pengawa nyadi indu misi kelimpah ulih besemekih ngena chara manah ba pelajar,” ku iya.
Dr Sim mansutka jaku nya lebuh bejaku ba Pengawa Nyain MoU entara I-Systems enggau SHG ba Hotel Penview kemari.
