KUCHING: Pemansang menua bepanggai ba rebak baru, nya kebuah perintah patut nyelinting sida tu.

Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah madah nembiak rebak baru patut diterenak enggau ulah ngasaika tanggungpengawa ngambika ulih nampung agenda pemansang menua.

“Enti penanggul rama ngaul raban nembiak enda diputar meruan deka ngasuh penanggul bukai nyadi, ukai semina nanggul bala nembiak aja tang mega menua.

“Nengah Komiti Perunding Nembiak Nengeri (MPBN) Renggat Nengeri Sarawak, kitai deka nemu bagi pekara dikedeka enggau dipinta sida lalu naka ulih nangkup pekara nya,” ku iya.

Abdul Karim mansutka jaku nya rambau atur pengawa bejadika Komiti Perunding Nembiak Nasional (MPBN) Renggat Nengeri Sarawak 2019-2020 di Sri Rampai Banquet Hall ditu tadi.

Iya mega temegah meda kaul entara opis menteri enggau ejensi bukai nyengkaum bala nembiak manah amat taja perintah nengeri enggau perintah besai enda sepenemu ba politik.

“Perintah kitai nengah Opis Menteri Nembiak enggau Lumba (KBS) ba renggat nasional enggau Opis Menteri Dagang Temuai, Seni, Main Asal, Nembiak enggau Lumba Sarawak chukup ngasika bala nembiak sereta ngaul mayuh kerejasama ngatur bemacham program ari sukut penemu nengah chara runding ‘Ari Nembiak Ungkup Nembiak’.

“Sukung nembiak ngemujurka inisiatif udah dilanggur enggau dipejalai perintang endang patut nentuka tuju enggau juluk nempa modal mensia menyana dudi hari,” ku iya nambah.

Abdul Karim mega madah deka ngemai raban nembiak berandau enggau bejuraika pemar ti dibai pemansang dunya kemaya hari.

Pemar ari sukut pekara rama, ekonomi, politik enggau teknologi enti enda diputar manah deka ngemai penimpang ba pengawa ngemansangka raban nembiak, ku iya.

Urung 110 iku datai ari opis perintah, ejensi sereta bala ketuai nembiak bisi ngulu atur pengawa sehari nya.