Nembiak ngambi Kus IT, Kus Landskap di Kolej Komuniti Mas Gading mimit

BAU: Komiti Besai Kolej Komuniti Mas Gading (KKMG) udah ngatur penemuai basa ngagai Adun Tasik Biru Dato Henry Harry Jinep ba Palan Servis Tasik Biru, Bau pagi ensanus.

Pejalai nemuai meri basa nya diatur urung sejam betuaika Direktor Kolej Komuniti Mas Gading, Nor Dalila Abd Rahman.

Ku Nor Dalila, tuju penemuai nya laban deka madah ngagai Henry pasal perambu KKMG nambahka penyampau tubuh nembiak ke udah abis SPM ba Pelilih Bau ngambi kus penuh disediaka KKMG.

Ku iya, kus ti disediaka tu iya nya Kus Teknologi Pemadah (IT) enggau Kus Landskap ke majak kurang sambut ari raban nembiak.

Nambahka nya, Henry udah merambu pasal tuju (blue print) pemansang infrakstruktur, ekonomi, pelajar, dagang enggau pengawa betanam betupi ba Bau deka ditampung baka ti udah diperambu.

Henry mega dekaka KKMG nambahka kus enggau sekeda kus pandak bepelasarka peminta peranak ba Pelilih Bau.

“Pekara tu beguna amat dikena nyungkak ekonomi rama peranak Bau ke ngalih ngagai pengawa betanam betupi enggau dagang online dikena ngelakuka produk sida.

“Peranak ba Bau mega dekaka KKMG ngatur kus baka tu,” terang Henry.

Sama datai nyempulang Nor Dalila iya nya Sapit Direktor Pengatur Pengawa, Mohd Saiful Fadli Maidin, Sapit Direktor Akademik, Yvone Xavera Dady, Kordinator Program Seumur Idup, Shirley Phillip, Pegawai Rejister Nembiak, Adi Amin Sarkawi Sarie enggau Pegawai Pemadah KKMG, Petrus Ngalih Tingi

Suara Sarawak