Nembiak ngambi Kus Seni Kulinari ba KSC dijamin bulih kereja

KUCHING: Nembiak lepas Sijil Pelajaran Malaysia (SPM) 2020 diperansang ngerebut peluang Program Khas Ungkup Bala Nembiak Sarawak – Seni Kulinari.

Tuai Pegawai Eksekutif Kuching Skills College, Novert Sullang madahka palan latih pengelandik sida bisi nyendiaka pelajar tikas Setipikit Pengelandik Malaysia (SKM).

Ku iya, bala nembiak ti ngulu program nya deka diberi elaun belanja idup sepenyampau RM11,700 sekumbang belajar dia.

“Elaun nya tadi enda nyengkaum pakej data internet, dijamin bulih kereja enggau setipikit diaku MQA.

Novert Sullang

“Tu entara pengelebih bala nembiak ti ngambi kus seni kulinari ba palan pengelandik kami ditu.

“Kami deka bejalaika program ngena chara hybrid – belajar teori nengah tali arus (online) enggau praktikal ba kolej,” ku iya ba sebengkah penerang, tadi.

Novert madah baru, program ngaul pengelandik agi ulih dipejalai maya Atur Mindah Betagang (PKP) laban sida ngatur kelas ngena chara betemu mua enggau online.

Nya alai ku iya, bala nembiak lepas sekula kelebih agi sida ke baru nerima pemutus SPM sehari tu anang irau ati laban mayuh peluang belajarka pengelandik ulih dipasuk sida.

Sebarang tanya enggau penerang silik tau telefon ngagai Adrian ba lumur +6016-859 5540 enggau Audrie (+6012-601 0366) sereta tau ngelawa page Kuching Skills College ba Facebook.

 

Suara Sarawak