ARTIKEL

ANANG MASAU PELUANG… Chieng Jen (tiga kanan) sereta bala bukai nunjukka brosur Program Perais Pemutus Nyulut SPM 2023 diatur Palan Servis Bandar Kuching enggau Palan Servis Stampin.

Nembiak nyulut nerima insentif ari Palan Servis Bandar Kuching enggau Palan Servis Stampin

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

KUCHING: Berita manah ungkup nembiak sitak Parlimen Kuching enggau Stampin ti bulih pemutus nyulut bulih 6A enggau ngelui ari nya ba peresa Sijil Pelajaran Malaysia (SPM) 2023.

Sida ti nyulut diatu ulih minta perasi ti disedia nengah Program Perais Pemutus Nyulut SPM 2023 diatur Palan Servis Bandar Kuching enggau Palan Servis Stampin.

Ku Kaban Parlimen Stampin, Chong Chieng Jen, bala nembiak ti bulih pemutus 6A deka nerima RM200, 7A (RM300), 8A (RM500), 9A (RM600) enggau 10A ke atas (RM700).

“Program ti belabuh dipejalai kenyau ari dua taun ke udah mujur ditampung taun tu nengah agih belanja tambah ari Perintah Besai.

“Program tu dikena ngaku nembiak ti bulih pemutus nyulut,” ku iya.

Chairman Parti Tindakan Demokratik (DAP) Sarawak mansutka jaku nya ba aum pemberita Program Perais Pemutus Nyulut SPM 2023 ba Indu Opis DAP, ditu kemari.

Ngenang pasal atur nya, iya madahka peminta meseti nembiak ti diau di Parlimen Bandar Kuching tauka Stampin.

“Peminta patut disempulang enggau salin tingki, transkrip peresa SPM 2023, setipikit badu sekula enggau penerang bank.

“Nya kebuah, bala nembiak diperansang nganjung peminta lalu haribulan kepenudi pukul 11.55 malam, 5 June tu,” terang iya.

Chieng Jen madah baru, sida tau nganjung peminta nengah Google Form lebuh scan kod QR ti dikunsi nengah Facebook rasmi Chieng Jen tauka Kaban Parlimen Bandar Kuching, Dr Kelvin Yii.

“Insentif ngagai nembiak nyulut tu deka diagih kena 15 June tu berebak enggau pejalai Eksibisyen Pelajar diatur Palan Servis Bandar Kuching enggau Stampin ti deka diatur ba palan besai bebelika barang Aeroville, Stutong sehari nya,” ku iya.

Iya mega ngelalau nembiak abis SPM nampung pelajar ba kus Sains, Teknologi, Injiniring enggau Matematik (STEM) ngambi ulih nangkup peminta pakar Sarawak.

“Malaysia kelebih agi Sarawak begunaka mayuh pengereja pengawa ti nguasa STM nipakka kitai nyingkang ngagai struktur ekonomi bepelasar ke industri teknologi tinggi enggau ekonomi digital,” ku iya nyemetak.

Mensia mayuh ti bisi tanya enggau deka nemu silik tau telefon ngagai DAP Kuching 082-335531 tauka 011-51337308.

BERITA LAIN

BERITA TERBARU