KOTA SAMARAHAN: Nembiak Unimas ti bemalam ba kampus dijaga enggau manah, pia ku Datuk Dr Mohamad Kadim Suaidi.

Mandal Chanselor Unimas madah, urung 3,100 nembiak Unimas agi bemalam ba kampung enggau ke bukai ulih pulai lebuh kemisi berengkah ari 14 March tu tadi sebedau Atur Tagang Pejalai (PKP) Renggat Keterubah dipejalai.

“Sida ke bemalam ba kampus dijaga enggau manah lalu pemakai bisi disediaka perintah, pengelikun enggau pengelantang nembiak dikemeratka kami.

“Bisi lebih ari 700 nembiak ukai peranak menua tu diau bemalam ba kampus mega diberi bantu enggau diasuh diau bemalam ba kampus,” ku iya meri penerang.

Terang iya, sitak kampus tetap dikategori Zon Gadung taja diau dalam sitak Zon Mirah enggau atur diterit ari sukut pengelikun enggau dipatau jaga kampus.

“Kami betuah laban semua nembiak ti diau ditu meri kerejasama tegut nitihka atur PKP ba kampus tu.

Iya madah, Palan Pengerai Unimas mega udah nyendiaka servis Pakar Berubat ari Fakulti Berubat enggau Sains Pengerai dikena nyaup Pemesai Perubat ti gawa nyaga pengerai bala nembiak ba Unimas.

Ku iya, Unit Kaunseling, HEPA Unimas mega udah disukung kaunselor berejister ari Fakulti Sains Kognitif dan Pembangunan Manusia enggau Kaban Psikologi ari Fakulti Perubatan dan Sains Kesihatan ngambi meri sukung ke manah agi ngagai bala nembiak ti begunaka servis nya.

Ba lansa sama, iya madahka pengawa ngajar enggau belajar udah diubah baka ti udah ditetapka enggau andalka pekara pelajar ba Unimas deka terus nitihka kualiti enggau standard baka ditetapka gerempung enggau ejensi bekaul.

“Pengawa ngajar enggau belajar baka sebedau tu deka ngalih ngagai e-learning ngambi nyukung enggau nyikap sebarang pekara ke deka nyadi enti Semester Dua diteruska pun bulan June tu ila.

“Pemutus enggau atur kami ba pekara tu nitihka sanding penemu enggau atur ari Perintah Besai enggau Komiti Penyangga Penusah Ngenyit Nengeri (JBPN) laban kami endang semampai beratka pengelikun bala nembiak enggau staf Unimas,” ku iya nerang silik.