ARTIKEL

TEMEGAH… Reynold temegah begambar ba kebun iya ti diberi nama RJ Farm ti bejalaika pengawa betanam betupi moden ngena sistem fertigasyen enggau hidroponik.

Nempa Sarawak nyadi tibang pemakai

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

TUSUN KETERUBAH

MINAT Reynold anak Jacktola, 29, ti rindu agi dikangau Nol ba pengawa betanam betupi nya endang dikembuan iya ari mit laban iya datai ari ruang bilik ti ngemeranka pengawa nya ba rumah panjai.

Apai enggau indai iya suah amat mai iya ke kebun maya agi mit suba sereta ngajar enggau nelebaka iya ngereja pengawa bekebun.

Lebuh ujung minggu tauka kemisi sekula, Reynold suah mantu apai enggau indai iya bekebun baka manchit, mantun rumput, nanam enggau ngembuah lada sereta pengawa bukai.

Tuju seduai ngaga baka nya ngambi iya ngembuan pengelandik bekebun kelimpah ngajar iya reti ngidupka diri empu enggau pemerinsa ngulihka belanja nyema enda pandai besekula.

REYNOLD ANAK JACKTOLA

Laban minat iya ba pengawa bekebun nya ditarak ari mit, nya kebuah maya nyambung pelajar ngagai tikas diploma, Reynold milih kus bekaul pengawa betanam betupi.

Pengudah tembu Pom 5, Reynold nyambung pelajar ba Universiti Putra Malaysia Kampus Bintulu (UPMKB) sereta ngambi kus Diploma Pengurusan Perladangan Makanan.

Ba dia, iya belajar bemacham penemu baru bekaul pengawa betanam betupi moden kelebih agi sistem fertigasyen enggau hidroponik.

NGEMANSANGKA TANAH
Berebak enggau penemu ti dikembuan, ba taun 2021, iya berengkah ngemansangka tanah sida dikena bejalaika pengawa betanam betupi ngena sistem fertigasyen enggau hidroponik.

Keterubah suba, iya bejalaika pengawa nya ba skala ti mit tang diatu iya nangkir kebun nya besai agi urung satu ikar pemesai ti diberi nama RJ Farm bepelasarka nama iya empu.

Bemacham bansa sayur ditanam iya ba RJ Farm baka ensabi, terung enggau rampu China sereta ngeluarka produk kediri empu.

Kebun RJ Farm ditumbuh ba tanah sida empu ba Batu Lintang, Undop, Sri Aman ti dibagi ngagai dua iti plot.

Plot keterubah dikena iya nanam terung enggau rampu China ngena sistem fertigasyen bedandang lalu plot sigi agi dikena iya nanam ensabi ngena sistem hidroponik ba rumah gadung (sistem bekibung tauka betutup).

Enda lama udah nya, ba taun sebaka, iya diterima gawa ba Serikat Positive Mind Sdn Bhd ti bepalan ba Kuching ti bejalaika Smart Farming tauka Kebun Pintar ti ngemeratka pengawa betanam betupi chara moden.

Ba serikat nya, iya diberi pangku pengawa nyadi Farm Executive ti ngintu enggau nyaga kebun pintar nya ti sebaka konsep enggau kebun iya empu.

Taja pen kiruh bejalaika pangku pengawa diri tang nya enda nekul Reynold ngintu, nyaga enggau ngabas kebun iya empu (RJ Farm).

Lebuh bisi kemisi enggau ujung minggu, iya deka pulai ke menua ngabas kebun iya lalu ba hari bukai iya gawa ba Serikat Positive Mind Sdn Bhd.

Reynold enda irau ati ninggalka kebun iya laban bisi apai enggau indai ti dikesayauka iya nyaga enggau ngintu kebun nya ba menua.

Lebuh dirandau pasal kebuah iya milih sistem fertigasyen enggau hidroponik, Reynold madah, kededua sistem nya ulih mansutka asil ti manah, mayuh enggau bekualiti agi.

Ukai naka nya aja, ku iya, utai tanam ti ditanam ngena sistem fertigasyen enggau hidroponik jampat besai enggau mansutka asil kelimpah muntang diintu.

PATUT DICHUNTO
Ba menua pesisir kelebih agi ba genturung pendiau rumah panjai, pengawa betanam betupi moden ngena sistem fertigasyen enggau hidroponik nya endang pekara baru.

Minat, pengangkun enggau pemerani Reynold ngerandang pengawa betanam betupi moden ba genturung pendiau sida ba Batu Lintang, Undop nya patut dichunto semua kitai.

Kebuah pia laban iya berani nyaut kangau perintah ti deka nempa nengeri tu nyadi tibang pemakai lebuh iya ngaga pemutus numbuhka RJ Farm.

Udah tentu penyulut iya ba pengawa nya deka matak minat peranak rumah panjai ngelingi nya nunda singkang iya lalu ngemansangka tanah sida empu bejalaika pengawa betanam betupi chara moden.

Nya beguna amat dikena mantu perintah nempa Sarawak nyadi tibang pemakai, nengeri maju enggau ngembuan penatai pemisi besai manggai ba taun 2030.

GALAK… Terung China ti ditanam Reynold ngena sistem fertigasyen bedandang chukup galak, jampat besai enggau mansutka asil.

NIPAK JULUK PERINTAH
Pengerekai igi penyakit COVID-19 ti balat nyadi ba taun 2020 enggau 2021 mai empas ti besai ngagai ekonomi dunya nyengkaum Sarawak enggau Malaysia.

Nya alai, dikena nyuman enggau ngemansangka ekonomi nengeri tu, Perintah Sarawak ngelanggur sereta bejalaika Strategi Pemansang Pengudah COVID-19 (PCDS) 2030.

PCDS 2030 nya siti ari inisiatif dikena nempa Sarawak nyadi siti nengeri maju enggau ngembuan penatai pemisi besai manggai ba taun 2030 nengah inovasyen enggau data.

Strategi pemansang 10 taun ti dilanchar Premier Sarawak, Datuk Patinggi Tan Sri Abang Johari Tun Openg ba taun 2021 nya mungkur pengelantang ekonomi, bungkur sosial enggau pemeruan rampa menua.

Iya madah, manggai ba taun 2030, Sarawak deka nyadi sebuah komuniti ti maju ti disungkak nengah data sereta inovasyen lalu semua orang deka ngasai pengelantang ekonomi, bungkur sosial enggau pemeruan rampa menua.

“Tu beguna amat dikena nempa Sarawak maju enggau ngembuan penatai pemisi besai manggai ba taun 2030,” ku iya nyemetak.

Nangkan nya, Abang Johari chakah nyerungkai kuasa ulih dikemaru dikena ngalih ngagai kuasa beresi sereta gadung baka kuasa hidro, solar, angin, hidrogen, karbon, minyak api ari lukut enggau ti bukai.

Nya mujur matak bala pemeranak puku ari serata dunya ti deka beranakka puku ba kuasa beresi enggau gadung dikena nyaga pemeruan rampa menua enggau nagang ubah klimet.

TIBANG PEMAKAI
Siti ari enam sektor ekonomi besai ti dikemerat ba PCDS 2030 iya nya sektor betanam betupi komersial kelimpah ari sektor kilang, dagang temuai, kampung, ngeluyang enggau servis sosial.

Berebak enggau juluk besai nya, Perintah Sarawak angkun ngemansangka sektor betanam betupi komersial ba nengeri tu dikena nempa Sarawak nyadi tibang pemakai dunya.

Pekara nya disukung gaya rampa menua ba nengeri tu ti nemban, gaya hari enggau tabur ai ujan ti chukup sereta tanah ti ami enggau besai endur bejalaika pengawa betanam betupi komersial.

Pengawa nempa Sarawak nyadi tibang pemakai tu beguna amat ngambi nengeri tu enda bepanggai penuh ba pemakai import, nentu pengelikun pemakai lokal enggau nyadi pengeksport tauka pemekal pemakai dunya.

Empai lama, sebengkah penerang ari Gerempung Pemakai Vietnam ti ditibak ari surat berita tali arus Berita Harian madahka menua pengeksport berau ketiga pemadu besai ba dunya nya deka ngurangka eksport berau sida.

Vietnam bejalaika polisi nya berebak ari ubah klimet enggau nentu pengelikun pemakai dalam menua sida empu.

Dulu agi ari nya, menua Thailand enggau India ti nyadi pemansut berau pemadu besai dunya bela bejalaika polisi sebaka.

Menua kitai bepanggai ba bekal berau import laban bekal berau lokal enda chukup dikena nampung peminta enggau guna rayat ba menua tu empu.

Ari nya, aram meh kitai berunding nama pekara ti deka nyadi ngagai menua kitai nyema kitai enda berengkah nyikap diri tumu napi pekara nya?

Enti menua pengeksport berau pemadu besai dunya ngurangka eksport berau sida, rega berau deka niki lalu nya nating pengidup rayat ti tebal agi datai ari ruang bilik ti ngembuan penatai pemisi baruh tauka B40.

Sedar ke pekara nya, nya kebuah Premier Sarawak, siku tuai ti jauh tinjau angkun deka nempa Tanah Kenyalang tu nyadi tibang pemakai dunya.

Iya ransing ngerah sereta ngelalau rayat ba nengeri tu ngalih ngagai sektor betanam betupi moden ti disungkak teknologi, inovasyen enggau data dikena nyapai juluk besai nya seraris enggau PCDS 2030.

Penyanding Penemu ba Opis Premier Sarawak (Industri Pemakai, Komoditi enggau Pemansang Wilayah) ti mega Kaban Kunsil Nengeri (ADUN) Pakan, Tan Sri William Mawan Ikom madah, pengawa betanam betupi kemaya hari siti ari pengawa dagang.

“Nya alai, pengawa betanam betupi ulih meri penatai pemisi besai enti dikemansang ba skala besai enggau chara komersial.

“Pia mega, pengawa ngena teknologi moden ba pengawa betanam betupi deka nambahka asil enggau ngelempungka pangku pengawa bala pekebun.

“Nengah pemansang teknologi digital kemaya hari, bala pekebun ulih ngelakuka produk enggau ngerembaika agi bungkur makit sida.

“Pekara tu endang disukung perintah laban Perintah Sarawak angkun mai rayat ba nengeri tu ngalih ngagai dunya digital dikena nempa Sarawak maju manggai ba taun 2030,” ku iya.

Mawan mansutka jaku nya ba sebengkah penerang ti ditibak ari surat berita Utusan Borneo rambau bejadi Program Transformasyen Menua Pesisir (RTP) ba Rumah Empawi Jilum, Batu 9, Jalai Engkamop, Pakan ba bulan March tu tadi.

Nangkan nya, Menteri Industri Pemakai, Komoditi enggau Pemansang Wilayah, Datuk Seri Stephen Rundi Utom madah, sistem betanam betupi ba Sarawak patut dikemanahka agi.

Iya madah, kebuah pia laban tikas pemansut asil betanam betupi Sarawak bedau ngemantupka ati lalu nya ulih dijapai nengah teknologi baru enggau moden.

“Bala pekebun mit enda ulih terus bepanggai ba pengawa betanam betupi chara lama tang sida patut ngalih ngagai pengawa betanam betupi moden.

“Sida patut nanggam kerejasama enggau raban peribit sereta ejensi perintah bekaul ti ngembuan pengulih ari sukut pekara wang enggau teknologi ngambi ulih ngemansangka pengawa betanam betupi ba tanah sida empu,” ku iya.

Pekara nya dibantai Dr Rundi rambau bejadi Program Ngintu Hari Integriti Opis Betanam Betupi Sarawak 2024 empai lama ti ditibak ari surat berita Suara Sarawak.

Bisi dua teknologi ti suah dikena ba sektor betanam betupi moden iya nya sistem fertigasyen enggau sistem hidroponik.

Nya alai, pengawa Reynold ba mekuh pengawa betanam betupi moden nya beguna amat dikena nyaut kangau perintah ti deka nempa Sarawak nyadi tibang pemakai.

BERITA LAIN

Belematika pemesai reti turai sejarah Sarawak

SIBU: Pengerami ‘722 Run For Sarawak’ udah dikelala nyadi sebengkah pengerami ti besai reti nyerumba Hari Sarawak. Sapit Menteri Pengerai Mensia Mayuh, Pengawa Berumah enggau

JHS chakah nyaga ekosistem bakau

KUCHING: Opis Kampung Sarawak (JHS) enggau raban volunteer ari Kampung Buntal nanam 200 paung kayu Bakau Kurap (Rhizophora Mucronata) sereta ngumpul 171 kilogram uras ba

BERITA TERBARU

Anwar puji pengalaman luas Awang Bemee

KUALA LUMPUR: Datuk Awang Bemee Awang Ali Basah, yang dilantik sebagai Yang Dipertua Dewan Negara yang baharu, mempunyai pengalaman luas pada peringkat negeri dan persekutuan

Kepimpinan kerajaan bekerja keras majukan Sarawak

BINTULU: Para pemimpin Kerajaan Sarawak terus bekerja keras demi memajukan negeri ini. Menteri Industri Makanan, Komoditi dan Pembangunan Wilayah Sarawak, Datuk Seri Dr Stephen Rundi

Belematika pemesai reti turai sejarah Sarawak

SIBU: Pengerami ‘722 Run For Sarawak’ udah dikelala nyadi sebengkah pengerami ti besai reti nyerumba Hari Sarawak. Sapit Menteri Pengerai Mensia Mayuh, Pengawa Berumah enggau